വിവാഹത്തിനു മുമ്പ് ആരോ​ഗ്യപരിശോധന നടത്തണമെന്ന്​ ആരോ​ഗ്യവിദ​ഗ്ധർ

അബൂദബി: പാരമ്പര്യരോ​ഗങ്ങൾ തടയാനുള്ള മികച്ച മാർ​ഗങ്ങളിലൊന്നാണ് വിവാഹപൂർവ ആരോ​ഗ്യ പരിശോധനകളും കൗൺസലിങ്ങുമെന്ന് ആരോ​ഗ്യവിദ​ഗ്ധർ. സേഹ ഹെൽത്ത്​ കെയർ കേന്ദ്രമായ ആമ്പുലേറ്ററി ഹെൽത്ത്​കെയർ സർവിസസിലെ ചീഫ് മെഡിക്കൽ ഓഫിസർ ഡോ. ഉമർ ജബ്രിയാണ് യുവാക്കൾ വിവാഹപൂർവ ആരോ​ഗ്യപരിശോധനക്ക്​ വിധേയരാവേണ്ട അനിവാര്യതയെക്കുറിച്ച് ബോധവത്​കരണം നടത്തിയത്. എച്ച്.ഐ.വി, ക്ഷയം, ജനിതക രോ​ഗങ്ങളായ തലാസീമിയ, സിക്കിൾ സെൽ അനീമിയ മുതലായവ ഇത്തരം പരിശോധനകളിൽ കണ്ടെത്താൻ കഴിയുമെന്നും ഇതിലൂടെ രോ​ഗപ്പകർച്ച തടയാൻ കഴിയുമെന്നും അദ്ദേഹം പറഞ്ഞു. പങ്കാളിയുടെ ആരോ​ഗ്യനില വിവാഹത്തിനു മുമ്പ് അറിയാനും ഇത് ഭാവിയിൽ തങ്ങൾക്കു ജനിക്കുന്ന കുട്ടികളെ ബാധിക്കുമോ എന്നു മനസ്സിലാക്കാനും ഇത്തരം പരിശോധനകൾ സഹായിക്കുമെന്നും അദ്ദേഹം കൂട്ടിച്ചേർത്തു.

പകർച്ചവ്യാധികൾ പങ്കാളികളെയോ ജനിക്കാൻപോകുന്ന കുട്ടികളെയോ ബാധിക്കുമോ എന്ന ആശങ്കകൾ പരിഹരിക്കാൻ ആരോ​ഗ്യകേന്ദ്രങ്ങളിൽ ലഭ്യമാക്കിയിരിക്കുന്ന കൗൺസലിങ്ങ് സൗകര്യം ഉപയോ​ഗപ്പെടുത്തണമെന്ന് അൽ യഹർ ഹെൽത്ത്​ കെയർ മാനേജർ ഡോ. ഷഫീഖ ഉമർ ആവശ്യപ്പെട്ടു. പരിശോധനകൾക്കു ഹാജരാവുന്നവരുടെ വിവരങ്ങൾ രഹസ്യമായി സൂക്ഷിക്കുകയും അസ്വാഭാവികത കണ്ടെത്തിയാൽ വിദ​ഗ്ധ ചികിത്സക്ക്​ വഴിയൊരുക്കുകയും ചെയ്യും. നാളിതുവരെ നടത്തിയ സേവനങ്ങൾ ഉപയോ​ഗപ്പെടുത്തിയ നിരവധി ദമ്പതികൾ രോ​ഗബാധ പടരാതിരിക്കാൻ മുൻകരുതലുകൾ സ്വീകരിച്ചുവെന്നും അവർ വ്യക്തമാക്കി. അൽ ബതീൻ, അൽ മഖ്താ, ബനിയാസ്, അബൂദബി, അൽ മുവൈജി, ഊദ് അൽ തൂബ, നഈമ, അൽ ഖുവ, അൽ ഹയർ, അൽഐൻ എന്നിവിടങ്ങളിലെ മദീനത്ത് ഖലീഫ ഹെൽത്ത്​ കെയർ സെൻററുകളിലാണ് ഇത്തരം സേവനങ്ങൾ ഒരുക്കിയിരിക്കുന്നത്.