ഇ-വാലറ്റ്​ സംവിധാനവുമായി ഹെൽത്ത്​ അതോറിറ്റി

ദ​ുബൈ: രോഗികൾക്കും ഉപഭോക്​താക്കൾക്കും ഇ-വാലറ്റ്​ സംവിധാനം വഴി പണം അടക്കാൻ സൗകര്യമൊരുക്കി ദുബൈ ഹെൽത്ത്​ അതോറിറ്റി.ഇതോടെ ഈ സംവിധാനം നടപ്പാക്കുന്ന ദുബൈയിലെ ആദ്യത്തെ സർക്കാർ സ്ഥാപനമായി ഡി.എച്ച്​.എ മാറി. കോവിഡ്​ കാലത്ത്​ പരസ്​പരം സ്​പർശിക്കാതെ ഇടപാടുകൾ നടത്താനും കടലാസ്​രഹിത ലോകം പ്രോത്സാഹിപ്പിക്കാനും ലക്ഷ്യമിട്ടാണ്​ പദ്ധതി നടപ്പാക്കിയത്​.ഡി.എച്ച്​.എയുടെ ആശുപത്രികളിലും ക്ലിനിക്കുകളിലും കായിക പരിശീലന കേന്ദ്രങ്ങളിലും ഈ സംവിധാനം വഴി പണം അടക്കാം. ഇതോടൊപ്പം പ്രത്യേക ഓഫറുകളും നൽകും.

റാഷിദ്​ ആശുപത്രിയിലാണ്​ സംവിധാനം ആദ്യമായി നടപ്പാക്കിയത്​. ഉടൻ ഡി.എച്ച്​.എയുടെ മറ്റ്​ സംവിധാനങ്ങളിലേക്കും സൗകര്യം വ്യാപിപ്പിക്കുമെന്ന്​ ഡി.എച്ച്​.എ ഡയറക്​ടർ ജനറൽ ഹുമൈദ്​ അൽ ഖതമി അറിയിച്ചു. ദുബൈ കിരീടാവകാശിയും എക്​സിക്യൂട്ടിവ്​ കൗൺസിൽ ചെയർമാനുമായ ശൈഖ്​ ഹംദാൻ ബിൻ മുഹമ്മദ്​ ബിൻ റാശിദ്​ ആൽ മക്​തൂമി​െൻറ നിർദേശപ്രകാരം രണ്ടു വർഷം മുമ്പാണ് കടലാസ്​ രഹിത​ പദ്ധതി നടപ്പാക്കാൻ തീരുമാനിച്ചത്​.അടുത്ത വർഷം അവസാനത്തോടെ ദുബൈയിലെ സർക്കാർ സ്ഥാപനങ്ങളിൽ പേപ്പറുകളുടെ ഉപയോഗം ഇല്ലാതാക്കുകയാണ്​ ലക്ഷ്യം.

മൊബൈൽ ആപ്പ്​ വഴി ഇ-വാലറ്റ്​ അനായാസം ഉപയോഗിക്കാൻ കഴിയും. മറ്റ്​ പേമെൻറ്​ ആപ്പുകളെ അപേക്ഷിച്ച്​ ഇ-വാലറ്റിനുള്ള നേട്ടം സ്വന്തമായി ബാങ്ക്​ അക്കൗണ്ടോ ഡെബിറ്റ്​-ക്രെഡിറ്റ്​ കാർഡുകളോ വേണ്ട എന്നതാണ്​. എമിറേറ്റ്​സ്​ ഐ.ഡിയും മൊബൈൽ നമ്പറുമുണ്ടെങ്കിൽ ഇ-വാലറ്റ്​ അക്കൗണ്ട്​ തുറക്കാം.രജിസ്​റ്റർ ചെയ്​ത ശേഷം മറ്റുള്ളവരുടെ അക്കൗണ്ട്​ വഴിയോ മൊബൈൽ റീചാർജ്​ വഴിയോ ബിൽ പേമെൻറ്​ വഴിയോ ചാർജ്​ ചെയ്​ത്​ ഉപയോഗിക്കാം. www.eWallet.ae എന്ന വെബ്​സൈറ്റിൽ കൂടുതൽ വിവരം ലഭിക്കും.