27ാം രാവിൽ പ്രാർഥനാ മുഖരിതമായി ഹറമുകൾ

മക്ക: റമദാൻ 27ാം രാവിൽ ഇരുഹറമുകളും പ്രാർഥനാമുഖരിതമായി. ലൈലത്തുൽ ഖദ്​റി​​​​െൻറ പുണ്യം തേടി മസ്​ജിദുന്നബവിയിലും മസ്​ജിദുൽ ഹറാമിലും തീർഥാടക ലക്ഷങ്ങളാണ്​ സംഗമിച്ചത്​. രാവിലെ മുതൽ മക്കയിയിലേക്കും മദീനയിലേക്കും ആളുകളുടെ ഒഴുക്കായിരുന്നു. പ്രാർഥനാ നിരതരായും പാപമോചനം തേടിയും ഖുർആൻ പാരായണത്തിൽ മുഴുകിയും ആളുകൾ​  നേരം പുലരുവേളം ഹറമുകളിൽ കഴിച്ചുകൂട്ടി​. രാത്രി നമസ്​കാരവേളയിൽ ഹറമും അങ്കണങ്ങളും നിറഞ്ഞുകവിഞ്ഞു. 

അസാധാരണ തിരക്ക്​ മൂൻകുട്ടി കണ്ട്​ വിവിധ വകുപ്പുകൾ വേണ്ട ഒരുക്കങ്ങൾ നേരത്തെ പൂർത്തിയാക്കിയിരുന്നു. മുഴുവൻ കവാടങ്ങളും തുറന്നിട്ടു. നമസ്​കാരത്തിന്​ കൂടുതൽ സ്​ഥലങ്ങൾ ഒരുക്കിയിരുന്നു​. എല്ലാ വകുപ്പുകളും പൂർണമായും സേവന രംഗത്തുണ്ടായിരുന്നുവെന്ന്​ ഇരുഹറം കാര്യാലയം വ്യക്​തമാക്കി. സേവനങ്ങൾ മികച്ചതാക്കാൻ വയർലസ്​ സാ​​​േങ്കതിക സംവിധാനങ്ങളും കാമറകളും കുറ്റമറ്റതാണെന്ന്​ ഉറപ്പുവരുത്തിയിരുന്നുവെന്നും പറഞ്ഞു. സുരക്ഷ വകുപ്പിന്​ കീഴിൽ തിരക്ക്​ നിയന്ത്രിക്കുന്നതിന്​ കൂടുതൽ പൊലീസുകാരെ നിയോഗിച്ചിരുന്നു. പൊതുസുരക്ഷാ വിഭാഗം ഹറമിലെ തിരക്കറിയിച്ചു എസ്​.എം.എസ്​ സന്ദേശങ്ങൾ അയച്ചു. ഹറം സുരക്ഷ സേനയുമായി സഹകരിച്ച്​ പ്​ളാസ്​റ്റിക്​ ബാരിക്കേഡ്​ ഉപയോഗിച്ച്​ നമസ്​കാര സ്​ഥലങ്ങൾ വേർത്തിരിച്ചത് തിരക്ക്​ കുറക്കാനും പോക്കുവരവുകൾ എളുപ്പവും വ്യവസ്​ഥാപിതമാക്കാനും സഹായിച്ചു.

നടപാതകളിലെ ഇരുത്തവും നമസ്​കാരവും കർശനമായി തടഞ്ഞു. തിരക്ക്​ നിരീക്ഷിക്കുന്നതിന്​ 14  ടവറുകൾ സുരക്ഷ വകുപ്പ്​ ഹറം മുറ്റങ്ങളിൽ ഒരുക്കിയിരുന്നു. നൂതനമായ കാമറകളും വിവിധ ഭാഗങ്ങളിൽ നിരീക്ഷണത്തിനായി ഘടിപ്പിച്ചിരുന്നു. ട്രാഫിക്​ വകുപ്പിന്​ കീഴിൽ ഹറമിനടുത്തും ഹറമിലേക്കെത്തുന്ന റോഡുകളിലും ഗതാഗത നിയന്ത്രണത്തിന്​ കൂടുതൽ​ പേർ രംഗത്തുണ്ടായിരുന്നു. ഹറമിനടുത്ത്​ തിരക്ക്​ കുറക്കാൻ മക്ക പ്രവേശന കവാടങ്ങൾക്കടുത്ത്​ ഒരുക്കിയ പാർക്കിങ്​ ​സ്​ഥലങ്ങളിലേക്ക്​ വാഹനങ്ങൾ തിരിച്ചുവിട്ടു. ഹറമിലേക്കും തിരിച്ചും യാത്രക്ക്​​ പത്ത്​ സ്​റ്റേഷനുകളിൽ നിന്ന്​ 2000 ഒാളം ബസുകൾ മേഖല ഗവർണറേറ്റ്​ ഒരുക്കിയിരുന്നു. മുൻകരുതലെടുത്തായും ഏത്​ അടിയന്തിരഘട്ടം നേരിടാൻ സജ്ജമാണെന്നും​ സിവിൽ ഡിഫൻസ്​ ട്വിറ്ററിലൂടെ നേരത്തെ അറിയിച്ചിരുന്നു. മക്ക മുനിസിപ്പാലിറ്റി ഹറമുകൾക്കടുത്ത്​ ശുചീകരണ ജോലികൾക്ക്​ കൂടുതലാളുകളെ നിയോഗിച്ചിരുന്നു.