ഹനിയുടെ ഇന്ത്യൻ പൗരത്വം സാധ്യമാക്കാൻ ശ്രമിക്കുമെന്ന്​ സി.ജിയുടെ ഉറപ്പ്​

ദുബൈ: വർഷങ്ങൾക്കു മുൻപ്​ കൈവിട്ടുപോയ ഉമ്മയേയും സഹോദരങ്ങളെയും സുഡാനിൽ നിന്ന്​ തേടിപ്പിടിച്ചെത്തിയ  ഹനി നാദർ മർഗാനി അലിക്ക്​ ഇന്ത്യൻ പൗരത്വം ലഭിക്കാൻ വേണ്ട നടപടികൾക്ക്​ പിന്തുണ നൽകുമെന്ന്​ ​ദുബൈ ഇന്ത്യൻ കോൺസുൽ ജനറൽ വിപുൽ ഉറപ്പു നൽകി. കുഞ്ഞുനാളിൽ കുടുംബത്തിൽ നിന്ന്​ വേർപ്പെടുത്തി പിതാവ്​ സുഡാനിലേക്ക്​ കൊണ്ടുപോയ ഹനി മണ്ണാർക്കാട്​ സ്വദേശി ഫാറൂഖ്​, റഹീം സിയാം കണ്ടം എന്നിവർ മുഖേനയാണ്​ ഉമ്മയുടെയും സഹോദരിമാര​ുടെയും വിലാസം കണ്ടെത്തിയത്​.

ദുബൈയിലുള്ള സഹോദരിയെ കാണാനെത്തിയതിനെക്കുറിച്ച്​  ‘ഗൾഫ്​ മാധ്യമം’ പ്രസിദ്ധീകരിച്ച വാർത്തയെ തുടർന്ന്​ മാധ്യമലോകവും വായനാ സമൂഹവും ഏറ്റെടുത്ത ഹനിയെ കാണാൻ കാത്തു കാത്തിരുന്ന ഉമ്മ നൂർജഹാൻ നാട്ടിൽ നിന്നെത്തിയിരുന്നു. ഷാർജയിൽ ജോലിയിൽ പ്രവേശിച്ച ഹനിക്ക്​ ഉമ്മയുടെയും സഹോദരങ്ങളുടെയും ഒപ്പം എന്നും കഴിയാൻ സൗകര്യം ലഭിക്കും വിധം ഇന്ത്യൻ പൗരത്വം നേടണം എന്നാണ്​ ആഗ്രഹം. ഇൗ ആവശ്യമുന്നയിച്ച്​ ഹനിയും സഹോദരി സമീറയും ദുബൈ കെ.എം.സി.സി​ പ്രസിഡൻറ്​ പി.കെ. അൻവർ നഹ, സാമൂഹിക പ്രവർത്തകൻ ഹാരിസ്​ കുണ്ടുകര എന്നിവർക്കൊപ്പമാണ്​ സി.ജിയെ കണ്ടത്​. ​  ദുബൈയിൽ നിന്ന് ഹാനിക്ക് ഇന്ത്യൻ പൗരത്വ കാർഡിനുള്ള അപേക്ഷ നൽകുമെന്നും സമയബന്ധിതമായി പൗരത്വം ലഭിക്കുന്നതിന് സമ്മർദ്ദം ചെലുത്തുമെന്നും അദ്ദേഹം പറഞ്ഞു. പാസ്പോർട്ട് കോൺസുൽ പ്രേം ചന്ദും സന്നിഹിതനായിരുന്നു.