വിസ വേണ്ടാത്ത ലോകത്തേക്ക് ഹംസ ഭായി യാത്രയായി

റാസൽഖൈമ: വിസയോ പാസ്പോർട്ടോ മറ്റു രേഖകളോ ഇല്ലാതെ റാസൽഖൈമയിൽ ചികിത്സയിൽ കഴിഞ്ഞ കോഴിക്കോട് കൊയിലാണ്ടി സ്വദേശി ഹംസ ഭായി നിര്യാതനായി. ഹൃദയാഘാതത്തെ തുടർന്ന് റാക് ഉബൈദുല്ല ആശുപത്രിയിൽ ചികിത്സയിലായിരുന്നു. ഒരു മാസം മുമ്പ് വഴിയിൽ തളർന്നുവീണ ഹംസയെ ആംബുലൻസ് വിഭാഗമാണ് ആശുപത്രിയിൽ എത്തിച്ചത്. മൂന്നര വർഷം മുൻപ്മ്പ് സന്ദർശക വിസയിലാണ് ഹംസ യു.എ.ഇയിൽ എത്തിയത്. ഇതിനുശേഷം വിസ പുതുക്കിയിട്ടില്ല. ചെറിയ ജോലികൾ ചെയ്ത് ജീവിക്കുകയായിരുന്നു. നാട്ടിലെത്തിയാൽ നാലുലക്ഷം രൂപ കടമുണ്ടെന്നും അതില്ലാതെ നാട്ടിലേക്ക് പോകാൻ കഴിയില്ലെന്നുമാണ് ഹംസ പറഞ്ഞിരുന്നത്. ഇതിനിടെയാണ് ഹൃദയാഘാതം വന്ന് റോഡിൽ വീണത്. പിതാവ്: മമ്മദ് കോയ. മാതാവ്: നഫീസ. മക്കൾ: അൽഅമീൻ, നാദിയ, ഫാത്തിമ, പരേതയായ അൽമുന. സഹോദരങ്ങൾ: സുബൈദ, സംസാദ്, സൗദ, റഷീദ്, റോഷ്ന. ഖബറടക്കം വ്യാഴാഴ്ച റാസൽഖൈമയിൽ.