ഹാഫ് മരത്തോണിന് റാസല്‍ഖൈമ ഒരുങ്ങി 

റാസല്‍ഖൈമ: 12ാമത് ഹാഫ് മരത്തോണിന് റാസല്‍ഖൈമയില്‍  ഒരുക്കങ്ങളായി വെള്ളിയാഴ്ച്ച രാവിലെ 06:30നാണ് മല്‍സരം തുടങ്ങുക. ഇതോടനുബന്ധിച്ച് വ്യാഴാഴ്ച്ച വൈകുന്നേരം മുതല്‍ മരത്തോണ്‍ അവസാനിക്കും വരെ റാസല്‍ഖൈമയിലെ വിവിധയിടങ്ങളില്‍ ഗതാഗത ക്രമീകരണങ്ങളേര്‍പ്പെടുത്തും. വനിത-പുരുഷ വിഭാഗങ്ങളിലെ മല്‍സര വിജയികള്‍ക്ക് ലക്ഷങ്ങള്‍ സമ്മാനമായി ലഭിക്കുന്ന മല്‍സരത്തില്‍ വിവിധ രാഷ്ട്രങ്ങളില്‍ നിന്ന്​ നൂറു കണക്കിന് പേര്‍ പങ്കെടുക്കും. റാക് കോര്‍ണീഷില്‍ നിന്നാണ് ഇക്കുറി മല്‍സരം തുടങ്ങുക. ഇതിനായി ഇവിടെ പ്രത്യേക വേദി ഒരുക്കിയിട്ടുണ്ട്.  യു.എ.ഇ സുപ്രീം കൗണ്‍സില്‍ അംഗവും റാക് ഭരണാധികാരിയുമായ ശൈഖ് സഊദ് ബിന്‍ സഖര്‍ ആല്‍ ഖാസിമി, റാക് കിരീടവകാശി ശൈഖ് മുഹമ്മദ് ബിന്‍ സഊദ് തുടങ്ങി പ്രമുഖര്‍ റാക് ഹാഫ് മരത്തോണ്‍ ഉദ്ഘാടന ചടങ്ങില്‍ സംബന്ധിക്കും.