അൽ ഗുവൈർ മാർക്കറ്റിൽ സൗഹൃദത്തി​െൻറ  ഇഫ്താർ

ഷാർജ: റോളയോട് ചേർന്ന് കിടക്കുന്ന അൽ ഗുവൈർ മാർക്കറ്റിലെ ഇഫ്താറിന് സൗഹൃദത്തി​​െൻറ രുചിയാണ്. മാർക്കറ്റിലെ കച്ചവടക്കാരും വഴിപോക്കരും ഉപഭോക്താക്കളും പ്രദേശ വാസികളുമെല്ലാം ചേർന്നിരുന്ന് ഓരോ നോമ്പും സന്തോഷത്തോടെ തുറക്കുന്നു. ഇഫ്താർ നടക്കുന്ന പ്രദേശത്ത് തണൽ വിരിച്ച് നിൽക്കുന്ന മരങ്ങളിലധികവും നട്ടുവളർത്തിയത് മലയാളികളായ സാമൂഹിക പ്രവർത്തകരാണ്. ചെറിയ ചരിത്രമൊന്നുമല്ല ഈ കച്ചവട നഗരത്തിനുള്ളത്. 
പണ്ട് പണ്ട് യു.എ.ഇ ജനിക്കുന്നതിനും മുമ്പ് അറബ് മേഖലയിലെ തന്നെ പ്രധാന കച്ചവട കേന്ദ്രമായിരുന്നു ഈ പ്രദേശം. ദൂര ദിക്കുകളിൽ നിന്നും കടൽ കടന്നും കച്ചവടക്കാർ എത്തിയിരുന്ന സ്​ഥലം. ഒട്ടകങ്ങളും കഴുതകളും താണ്ടിയ ദൂരത്തി​​െൻറ ക്ഷീണം മാറ്റാൻ റോള (പേരാൽ) മരത്തി​​െൻറ തണലിൽ കിടന്നിരുന്ന കാലം. അന്നത്തെ റമദാനിലും ഇത്തരം സൗഹൃദത്തി​​െൻറ ഇഫ്താറുകൾ നടന്നിരുന്നുവെന്നാണ് ചരിത്രം. 

പടിപടിയായി കാലവും ദേശവും വളർന്നെങ്കിലും ഇഫ്താറിലെ സൗഹൃദവും സ്​നേഹവും സന്തോഷവും അതേ ചാരുതയോടെ നിലനിൽക്കുന്നത് ഈ നഗരത്തി​​െൻറ സാംസ്​കാരികമായ അടയാളത്തെയാണ് ഉയർത്തി കാട്ടുന്നത്. ബുഹൈറ കോർണീഷിലെ പാം ഒയായീസ്​ എന്നറിയപ്പെടുന്ന ഈന്തപ്പനക്കാട്ടിലെ ഇഫ്താറിന് കൂട്ടുകുടുംബങ്ങളുടെ ഐശ്വര്യമാണ്. കുടുംബങ്ങൾ ഇവിടെ ഇഫ്താറിനായി ഒത്തുകൂടുന്നു. ബാച്ച്​ലർമാരും കൂട്ടം കൂടി ഇവിടെ ഇഫ്താറിനെത്തുന്നു.

നമസ്​ക്കരിക്കാനും പ്രാഥമിക ആവശ്യങ്ങൾ നിർവ്വഹിക്കാനും ഇഷ്​ടം പോലെ സൗകര്യം ഇവിടെയുള്ളത് കൊണ്ടും ഖാലിദ് തടാകത്തിലെ തണുത്ത കാറ്റ് ചൂടിനെ ചെറുക്കുന്നത് കൊണ്ടും, പൂന്തോട്ടങ്ങളിൽ നിന്ന് നല്ലനറുമണം ഒഴുകി വരുന്നത് കൊണ്ടും ഈ പ്രദേശം എല്ലാവരുടെയും ഇഷ്​ടമേഖലയാണ്. ഇത്തവണ റമദാനിന് ഇവിടെയുള്ള ഈന്തപ്പനകളിലെ ഈത്തപ്പഴം പഴുക്കാത്തത് സന്ദർശകർക്ക് ഇത്തിരി വിഷമം ഉണ്ടാക്കുന്നുണ്ട്. പഴുത്തിരുന്നെങ്കിൽ പ്രകൃതി പറിച്ചിട്ട ഈത്തപ്പഴം തിന്ന് നോമ്പ് തുറക്കമായിരുന്നു. എന്നാലും ചില മരങ്ങളിൽ  നിന്ന് മൂത്ത പഴങ്ങൾ താഴെ വീഴുന്നുണ്ട്.