യു.എ.ഇയിൽ നിന്ന്​ ആദ്യ വിമാനം  ഉച്ചക്ക്​ 2.10ന്​ 

ദുബൈ: നാട്ടിലേക്ക്​ മടങ്ങുവാൻ ഏറ്റവുമധികം ആളുകൾ താൽപര്യമറിയിച്ച യു.എ.ഇയിൽ നിന്ന്​ ഇന്ത്യക്കാരെ വഹിച്ചുള്ള ആദ്യ വിമാനം വ്യാഴാഴ്​ച ഉച്ചക്ക്​ 2.10ന്​ പുറപ്പെടും.ദുബൈയിൽ നിന്ന്​ കോഴിക്കോ​േട്ടക്കുള്ള എയർ ഇന്ത്യ എക്​സ്​പ്രസ്​ IX0344 വിമാനത്തിൽ 170 പേരെയാണ്​ കൊണ്ടുപോവുകയെന്ന്​ കോൺസുൽ നീരജ്​ അഗ്രവാൾ വ്യക്​തമാക്കി.

ആദ്യ ദിനയാത്രക്കാർക്കുള്ള ടിക്കറ്റ്​ ഇന്ത്യൻ എംബസിയുടെയും കോൺസുലേറ്റി​​െൻറയും നിർദേശപ്രകാരം ലഭ്യമാക്കിവരുന്നു. ടിക്കറ്റ്​ ലഭിച്ച യാത്രക്കാർക്ക്​ മാത്രമേ വിമാനത്താവളത്തിലേക്ക്​ പ്രവേശനമുള്ളൂ.  200 പേരെ വിമാനത്തിൽ കൊണ്ടുപോകുവാനാണ്​ ആദ്യം തീരുമാനിച്ചിരുന്നതെങ്കിലും സാമൂഹിക അകലം ഉറപ്പാക്കുന്നതി​​െൻറ ഭാഗമായി എണ്ണത്തിൽ കുറവ്​ വരുത്തുകയായിരുന്നു.

വിമാനത്താവളത്തിൽ സാമൂഹിക അകലവും സുരക്ഷാ മുൻകരുതലുകളും കർശനമായി പാലിക്കണം.ഇന്ത്യയിലേക്കുള്ള യാത്രക്കാരെ കൊണ്ടുപോകുവാനുള്ള നടപടിക്രമങ്ങൾ ആരംഭിക്കുന്നതിനിടെ ദുബൈ വിമാനത്താവളം അതിനാവശ്യമായ എല്ലാവിധ മുൻകരുതലുകളും ഒരുക്കിത്തുടങ്ങി. സാമൂഹിക അകലം പാലിക്കുന്നത്​ സംബന്ധിച്ചുള്ള അറിയിപ്പ്​ ബോർഡുകളും യാത്രക്കാർ ദൂരപരിധിയിൽ നിൽക്കുവാനുള്ള സൂചനാ സ്​റ്റിക്കറുകളും പതിച്ചിട്ടുണ്ട്​.

യാത്രക്കാർക്ക്​ മാസ്​കുകൾ, സാനിറ്റൈസർ എന്നിവ വിമാനത്താവളത്തിൽ ലഭ്യമാക്കും. അവ ഉപയോഗിക്കൽ യാത്രയിൽ നിർബന്ധമാണ്​. എല്ലാവിധ ആരോഗ്യ നിർദേശങ്ങളും പാലിക്കാൻ സന്നദ്ധരാണ്​ എന്ന്​ വ്യക്​തമാക്കുന്ന സത്യവാങ്​മൂലം ഒപ്പിട്ടു മാത്രമേ യാത്ര തുടരാനുമാവൂ.