ഷേരി, സാഫി  മീൻരുചി വീണ്ടും

ദുബൈ: മത്സ്യസമ്പത്ത് സംരക്ഷിക്കുക എന്ന ലക്ഷ്യത്തോടെ ഷേരി, സാഫി മത്സ്യങ്ങൾ പിടിക്കുന്നതിനുള്ള വിലക്ക്​ തിങ്കളാഴ്​ച അവസാനിക്കുന്നു. പ്രജനന കാലമായ മാർച്ച്​ ഒന്ന്​ മുതൽ ഏപ്രിൽ 30 വരെയാണ്​ യു.എ.ഇയിൽ ഇൗ മത്സ്യങ്ങൾ പിടിക്കുന്നതിന്​ നിരോധനം ഏർപ്പെടുത്തിയിരുന്നത്​.സമുദ്ര സമ്പത്ത്​ ചൂഷണം ചെയ്യുന്നത്​ നിയന്ത്രിക്കുന്നതിനും അവയുടെ നാശം ഒഴിവാക്കുന്നതിനുമുള്ള ഫെഡറൽ നിയമം നടപ്പാക്കുന്നതിൽ ദുബൈ നഗരസഭ അതീവ ശ്രദ്ധ പുലർത്തുന്നതായി നഗരസഭാ ഡയറക്​ടർ ജനറൽ എൻജിനീയർ ഹുസൈൻ നാസർ ലൂത്ത പറഞ്ഞു.

നിയമം പാലിക്കുന്നതിൽ കണിശത കാണിച്ച മീൻപിടിത്തക്കാരോടും കച്ചവടക്കാരോടും അദ്ദേഹം നന്ദി പറഞ്ഞു. ഒരു തരത്തിലുളള നിയമലംഘനവും ഉണ്ടായില്ല. എല്ലാ മാർക്കറ്റുകളും ഷോപ്പിങ്​ മാളുകളും മറ്റു വിൽപന സ്​റ്റാളുകളും സമ്പൂർണ ഉത്തരവാദിത്തം കാണിച്ചു. എമിറേറ്റി​​െൻറ മത്സ്യസമ്പത്ത്​ സംരക്ഷിക്കുന്നതിനുള്ള വലിയ ശ്രദ്ധയുടെ തെളിവാണ്​ ഇത്​. നിരോധനത്തി​​െൻറ ഉദ്ദേശ്യം എല്ലാവർക്കും മനസ്സിലായി. നിയമം ലംഘിച്ചാലുള്ള ശിക്ഷാനടപടി കാരണമായി മാത്രമല്ല നിരോധനം കൊണ്ടുള്ള മെച്ചം ലഭിക്കുമെന്ന അവബോധവും ഇതിന്​ ഇൗ ശ്രദ്ധക്ക്​ കാരണമാണെന്ന്​ അ​േദ്ദഹം പറഞ്ഞു.

​മീൻപിടിത്ത നിരോധന കാലയളവിൽ ദേര മീൻ മാർക്കറ്റുകളിലും ഉമ്മു സുഖീം തുറമുഖത്തും ദുബൈ നഗരസഭ നിരവധി കാമ്പയിനുകൾ സംഘടിപ്പിച്ചതായി നഗരസഭ പരിസ്​ഥിതി വിഭാഗം ഡയറക്​ടർ എൻജിനീയർ ആലിയ ആൽ ഹർമൂദി അറിയിച്ചു. മത്സ്യവിൽപന നടത്തുന്ന 42 ഷോപ്പിങ്​ സ​െൻററുകളിൽ പരിശോധന നടത്തിയതായും അവർ പറഞ്ഞു.

മാര്‍ച്ച് ഒന്ന് മുതല്‍ ഏപ്രില്‍ 30 വരെ ഷേരി, സാഫി മീനുകൾ വലയില്‍ കുടുങ്ങിയാല്‍ അവയെ കടലിലേക്ക് മടക്കി എത്തിക്കണമെന്നാണ് 2015ലെ കാലാവസ്​ഥ വ്യതിയാന^പരിസ്ഥിതി നിയമം വ്യവസ്​ഥ ചെയ്യുന്നത്. ഇതനുസരിച്ചാണ്​ ഇൗ മീനുകൾ ചന്തയിലോ കടകളിലോ വില്‍ക്കുന്നതിന്​ വിലക്ക്​ ഏർപ്പെടുത്തിയിരുന്നത്​. ഇറക്കുമതി ചെയ്ത മീനുകൾക്കും വിലക്ക് ബാധകമായിരുന്നു. ബോട്ട് ലൈസന്‍സ് റദ്ദാക്കൽ ഉള്‍പ്പെടെയുള്ള നടപടികളാണ് നിയമലംഘകര്‍ക്കെതിരെ പ്രഖ്യാപിച്ചിരുന്നത്​.