സർക്കാർ സേവനങ്ങൾ ഇനി വീട്ടിലെത്തും; ഹാപ്പിനസ്​ വെഹിക്ക്​ൾ പദ്ധതിയുമായി ദുബൈ മുനിസിപ്പാലിറ്റി

ദുബൈ: എമിറേറ്റിലെ നിവാസികൾക്ക്​ സർക്കാർ സേവനങ്ങൾ വീട്ടുപടിക്കൽ എത്തിക്കാൻ ‘ഹാപ്പിനസ്​ വെഹിക്ക്​ൾ’ എന്ന പേരിൽ പുതിയ സംരംഭത്തിന്​ തുടക്കമിട്ട്​ ദുബൈ മുനിസിപ്പാലിറ്റി. തടസ്സമില്ലാതെ ഏറ്റവും സൗകര്യപ്രദമായ രീതിയിൽ സർക്കാർ ഇടപാടുകൾ പൂർത്തിയാക്കാൻ കഴിയുന്ന രീതിയിലാണ്​ ‘ഹാപ്പിനസ്​ വെഹിക്ക്​ൾ’ സംരംഭം രൂപകൽപന ചെയ്തിരിക്കുന്നതെന്ന്​ മുനിസിപ്പാലിറ്റി അറിയിച്ചു.

വകുപ്പിന്‍റെ മുഴുവൻ ഡിജിറ്റൽ സേവനങ്ങളും പുതിയ സംരംഭത്തിലൂടെ ലഭിക്കും. കൂടാതെ മറ്റു നടപടികൾ കാര്യക്ഷമമായും വേഗത്തിലും പൂർത്തീകരിക്കാനും കഴിയും. ഈ വർഷം സർക്കാർ പ്രഖ്യാപിച്ച ‘സമൂഹ വർഷ’ത്തിന്‍റെ ഭാഗമായാണ്​ വ്യത്യസ്തമായ സേവനസംരംഭം​ മുനിസിപ്പാലിറ്റി തുടക്കമിട്ടിരിക്കുന്നത്​. ഓഫിസുകൾ കയറിയിറങ്ങാതെ വീട്ടിൽ ഇരുന്നുകൊണ്ടു തന്നെ സർക്കാർ സേവനങ്ങൾ സുഗമമായി പൂർത്തീകരിക്കാൻ നിവാസികൾക്ക്​ കഴിയുന്നുവെന്ന്​ സംരംഭം ഉറപ്പുവരുത്തും. മുതിർന്ന പൗരൻമാർക്കും നിശ്ചയദാർഢ്യ വിഭാഗങ്ങൾക്കും മറ്റു​ സഹായം ആവശ്യമുള്ളവർക്കും പദ്ധതി ഏറെ ഉപകാരപ്രദമാവും.

തുടക്കത്തിൽ മുതിർന്ന പൗ​രൻമാരെ ലക്ഷ്യംവെച്ച്​ അവതരിപ്പിച്ച സംരംഭം എമിറേറ്റിലെ മുഴുവൻ ജനങ്ങളെയും ഉൾപ്പെടുത്തി വിപുലീകരിച്ചിരിക്കുകയാണ്​. മുൻകൂറായി ‘ഹാപ്പിനസ്​ വെഹിക്ക്​ൾ’ സേവനം നിവാസികൾക്ക്​ ബുക്ക്​ ചെയ്യാം​. ഇതുവഴി സൗകര്യപ്രദമായ സമയം ​ഗുണഭോക്​താക്കൾക്ക്​ ഷെഡ്യൂൾ ചെയ്യാനാവും. മുനിസിപ്പാലിറ്റിയുടെ കസ്റ്റമർ സർവിസ്​ ടോൾഫ്രീ നമ്പറായ 800900യിൽ വിളിച്ചാണ്​ സമയം ബുക്​ ചെയ്യേണ്ടത്​.

എല്ലാ ദിവസവും രാവിലെ ഒമ്പത്​ മുതൽ ഉച്ചക്ക്​ 2.30 വരെ സേവനം ലഭ്യമാണ്​. ശക്തമായ സാമൂഹിക ബന്ധങ്ങൾ വളർത്തിയെടുക്കാൻ ലക്ഷ്യമിടുന്ന ‘സമൂഹ വർഷം’ സംരംഭത്തിന്‍റെ ഭാഗമായി കൂടുതൽ ശക്തവും പിന്തുണയുള്ളതുമായ ഒരു സമൂഹം കെട്ടിപ്പടുക്കുന്നതിനുള്ള ദുബൈയുടെ നിരന്തര ശ്രമങ്ങളെ ഈ സേവനം പിന്തുണക്കുന്നതായി ദുബൈ മുനിസിപ്പാലിറ്റി അധികൃതർ അറിയിച്ചു.