യു.എ.ഇയിലെ എല്ലാ ഡോക്​ടർമാർക്കും ഗോൾഡൻ വിസ

ദുബൈ: യു.എ.ഇയുടെ പത്തുവർഷ ഗോൾഡൻ വിസ എല്ലാ ഡോക്​ടർമാർക്കും അനുവദിക്കുന്നു. ആരോഗ്യ വകുപ്പി​െൻറ ലൈസൻസുള്ള എല്ലാ ഡോക്​ടർമാർക്കും കുടുംബത്തിനും ഈ മാസം മുതൽ 2022 സെപ്​റ്റംബർ വരെ അപേക്ഷിക്കാമെന്ന്​ അധികൃതർ അറിയിച്ചു. ആരോഗ്യമേഖലയിൽ ചെയ്​ത സേവനങ്ങളും ത്യാഗവും മുൻ നിർത്തിയാണ്​ സർക്കാർ ഡോക്​ടർമാരെ പ്രത്യേകമായി പരിഗണിച്ചത്​. smartservices.ica.gov.ae എന്ന വെബ്​സൈറ്റ്​ വഴിയാണ്​ അപേക്ഷിക്കേണ്ടത്​. ദുബൈ ലൈസൻസുള്ള ഡോക്​ടർമാർക്ക്​ smart.gdrfad.gov.ae എന്ന വെബ്​സൈറ്റിലൂടെ അപേക്ഷിക്കാം. ബന്ധപ്പെട്ട സർക്കാർ വകുപ്പുകൾ അപേക്ഷകൾ പരിശോധിച്ച്​ യോഗ്യതയുള്ളവർക്ക്​ മാത്രമായിരിക്കും വിസ അനുവദിക്കുക.

ഫെഡറൽ അതോറിറ്റി ഫോർ ഐഡൻറിറ്റി ആൻഡ് സിറ്റിസൺഷിപ്പ് രാജ്യത്ത്​ ഡോക്​ടർമാരുടെ അപേക്ഷ സ്വീകരിക്കാനായി ഏഴ്​ കേന്ദ്രങ്ങൾ ആരംഭിക്കുകയും ചെയ്യും. ശാസ്ത്രീയമായ കഴിവും വൈദഗ്ധ്യവുമുള്ളവർക്ക് ഗോൾഡൻ വിസ അനുവദിക്കാൻ യു.എ.ഇ വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂമി​െൻറ ഉത്തരവ്​ പാലിക്കുന്നതി​െൻറ ഭാഗമായാണ്​ വിസ അനുവദിക്കുന്നത്​. മെഡിക്കൽ രംഗത്തെ വിദഗ്​ധരെ യു.എ.ഇയിൽ തുടരുന്നതിന്​ ഈ ഇളവ്​ പ്രേരിപ്പിക്കുകയും കൂടുതൽ പേരെ രാജ്യത്തേക്ക്​ ആകർഷിക്കുകയും ചെയ്യും. കോവിഡ്​ തുടങ്ങിയ ശേഷം യു.എ.ഇയിലെ നിരവധി ഡോക്​ടർമാർക്ക്​ ഗോൾഡൻ വിസ ലഭിച്ചിട്ടുണ്ട്​.

2018ലെ യു.എ.ഇ കാബിനറ്റ്​ തീരുമാനപ്രകാരമാണ്​ ഗോൾഡൻ വിസ എന്ന പത്തുവർഷ താമസ പെർമിറ്റ്​ അനുവദിച്ചത്​. കൂടുതൽ പ്രതിഭകളെ രാജ്യത്ത്​ തുടരുന്നതിന്​ പ്രോൽസാഹിപ്പിക്കാൻ വിവിധ മേഖലകളിൽ കൂടുതൽ ഗോൾഡൻ വിസകൾ അനുവദിക്കുന്നുണ്ട്​​ സർക്കാർ. ലോകത്തി​െൻറ വിവിധ ഭാഗങ്ങളിൽ നിന്നുള്ള ഒരു ലക്ഷം കോഡർമാർക്കാണ്​​ ഗോൾഡൻ വിസ നൽകുമെന്ന്​ പ്രഖ്യാപിച്ചിട്ടുണ്ട്​. മികച്ച വിജയം നേടുന്ന വിദ്യാർത്ഥികൾ, ഡോക്​ടറേറ്റ്​ നേടിയവർ, കമ്പ്യൂട്ടർ എഞ്ചിനീയറിങ്​, ഇലക്​​ട്രോണിക്​സ്​, കോഡിങ്​, ഇലക്​ട്രിസിറ്റി, ബയോടെക്​നോളജി മേഖലയിലെ എഞ്ചിനിയർമാർ എന്നിവരെയും ഗോൾഡൻ വിസക്ക്​ പരിഗണിക്കുന്നുണ്ട്​.