ഗോൾഡൻ ഫോർക്ക്​ ​തൊഴിലാളികൾക്ക്​ നാട്ടിലേക്ക്​ മടങ്ങാൻ വഴി തുറക്കുന്നു

ദുബൈ: മാസങ്ങളുടെ ശമ്പളം കുടിശികയാക്കി ഉടമ മുങ്ങിയതോടെ കഷ്​ടത്തിലായ ഗോൾഡൻഫോർക്ക്​ റസ്​റ്ററൻറ്​ തൊഴിലാളികൾക്ക്​ നാട്ടിലേക്ക്​ മടങ്ങാൻ വഴി​െയാരുങ്ങുന്നു. വാടക നൽകാനില്ലാത്തതു മൂലം ലേബർ ക്യാമ്പിൽ നിന്ന്​ കുടിയിറക്കപ്പെട്ട തൊഴിലാളികളുടെ വേദന ഗൾഫ്​ മാധ്യമവും മീഡിയാ വൺ ചാനലും ചേർന്ന്​ പുറത്തെത്തിച്ചതാണ്​ വഴിത്തിരിവായത്​. വിദേശ കാര്യ മന്ത്രി സുഷമാ സ്വരാജി​​െൻറ ഒഫീസും ദുബൈ ഇന്ത്യൻ കോൺസുലേറ്റുമെല്ലാം വിഷയം അന്വേഷിക്കാൻ മുന്നോട്ടു വന്നു.

ഉമ്മുൽ ഖുവൈനിലെ മറ്റൊരു താമസ കേന്ദ്രത്തിൽ ദുരിതപ്പെട്ടു കഴിഞ്ഞു കൂടിയ തൊഴിലാളികൾ വിസ കാലാവധി തീർന്നതിനേ തുടർന്ന്​ അടക്കേണ്ട പിഴയും നാട്ടിലേക്കുള്ള വിമാന ടിക്കറ്റും കോൺസുലേറ്റ്​ മുഖേന ലഭ്യമാവാൻ സാധ്യത തെളിയുകയും ചെയ്​തു. എന്നാൽ നാട്ടിലേക്ക്​ മടങ്ങുന്നതിനുള്ള നടപടി ക്രമങ്ങളുടെ ഭാഗമായി ഇവർ നൽകിയ കേസ്​ പിൻവലിക്കാൻ പണം വേണമെന്നു വന്നതോടെ തൊഴിലാളികൾ വീണ്ടും പ്രതിസന്ധിയിലായി.

ഗൾഫ്​ മാധ്യമത്തിലൂടെ ഇൗ വിവരമറിഞ്ഞ മലബാർ ഗോൾഡ്​ ജ്വല്ലറിയുടെ സി.എസ്​.ആർ. വിഭാഗം ഇൗ പണം അടക്കാൻ മുന്നോട്ടു വരികയായിരുന്നു.  24 തൊഴിലാളികളുടെ പേരിൽ 365 ദിർഹം വീതം ഇന്നലെ ഖിസൈസ്​ തഹ്​സീൽ സ​െൻററിൽ മലബാർ ഗോൾഡ്​ സി.എസ്​.ആർ മ​ാനേജർ കെ.എസ്​. ഹംസയുടെ നേതൃത്വത്തിൽ കെട്ടിവെച്ചു.  എന്നാൽ തൊഴിലാളികള്‍ക്ക് കിട്ടാനുള്ള വന്‍തുകയുടെ ശമ്പളം ഇപ്പോഴും കുടിശ്ശികയാണ്​.