ഗ്ലോബൽ വില്ലേജിൽ പോകാൻ കൂടുതൽ ബസുകൾ

ദുബൈ: വിനോദവും വിസ്​മയങ്ങളുമായി ലോകം ദുബൈയിൽ സന്ധിക്കുന്ന ഗ്ലോബൽ വില്ലേജിലേക്ക്​ രണ്ട്​ പുതിയ ബസ്​ റൂട്ടുകൾ.  ഗ്ലോബൽ വില്ലേജി​​െൻറ വാതിൽ തുറക്കുന്ന  നവംബർ ഒന്നിന്​ തന്നെ 102,106 നമ്പർ ബസ്​ റൂട്ടുകളിലും സർവീസ്​ തുടങ്ങും. പൊതുഗതാഗത സൗകര്യങ്ങളോട്​ വർധിച്ചു വരുന്ന താൽപര്യം പരിഗണിച്ചാണ്​ രണ്ട്​ ബസ്​ റൂട്ടുകൾ കൂടി തുടങ്ങുന്നതെന്ന്​ റോഡ്​ ഗതാഗത അതോറിറ്റി (ആർ.ടി.എ) ആസൂത്രണ വിഭാഗം ഡയറക്​ടർ മുഹമ്മദ്​ അബൂബക്കർ അൽ ഹാഷിമി പറഞ്ഞു. റാശിദീയ മെട്രോ സ്​റ്റേഷനിൽ നിന്നാരംഭിച്ച്​ ​ഗ്ലോബൽ വില്ലേജിൽ എത്തുന്നതാണ്​  102 ബസ്​ റൂട്ട്​. 106 നമ്പർ റൂട്ട്​ മാൾ ഒഫ്​ എമിറേറ്റ്​സിൽ നിന്നാണ്​ ആരംഭിക്കുക. 

​ഗ്ലോബൽ വില്ലേജിലേക്ക്​ കൂടുതലായി എത്തുന്ന ആളുകളുടെ സൗകര്യം കണക്കിലെടുത്ത്​ 103,104 നമ്പർ റൂട്ടുകളും പുനരാരംഭിക്കുന്നുണ്ട്​. റൂട്ട്​ 103 യൂനിയൻ മെട്രോ സ്​റ്റേഷനിൽ നിന്നാരംഭിച്ച്​ അൽ റാബത്​ സ്​ട്രീറ്റ്​ മുഖേന ഗ്ലോബൽ വില്ലേജിലേക്ക്​ പോകും. റൂട്ട്​ 104 അൽ ഗുബൈബ സ്​റ്റേഷനിൽ നിന്നാരംഭിച്ച്​ ജാഫിലിയ്യ മെട്രോ സ്​റ്റേഷൻ വഴി ഗ്ലോബൽ വില്ലേജിൽ എത്തും.  നഗരത്തിലെ ജനസംഖ്യാ വർധന അനുസരിച്ച്​ വർധിക്കുന്ന ആവശ്യങ്ങൾ കണക്കിലെടുത്തും പരിസ്​ഥിതിക്ക്​ ഇണങ്ങുന്നതും സൗകര്യപ്രദവുമായ പൊതുഗതാഗത ശീലങ്ങൾ വ്യാപിപ്പിക്കുന്നതിനുമായി  ഗതാഗത ശൃംഖല കൂടുതൽ കരുത്തുറ്റതാക്കാൻ ആർ.ടി.എ ശ്രദ്ധിക്കുമെന്ന്​ ഹാഷിമി പറഞ്ഞു.