എക്​സൈസ്​ നികുതിയടവ്​ ഉറപ്പാക്കാൻ ഡിജിറ്റൽ ടാക്​സ്​ സ്​റ്റാമ്പ്​ സംവിധാനം

അബൂദബി: പുകയില ഉൽപന്നങ്ങൾക്കുള്ള എക്​സൈസ്​ നികുതിയടവ്​ ഉറപ്പുവരുത്താൻ ഡിജിറ്റൽ ടാക്​സ്​ സ്​റ്റാമ്പ്​ ഉപയോഗിച്ചുള്ള ഇലക്​ട്രോണിക്​ ട്രാക്കിങ്​ സംവിധാനം ഏർ​െപ്പടുത്തുന്നതായി ഫെഡറൽ നികുതി അതോറിറ്റി (എഫ്​.ടി.എ) പ്രഖ്യാപിച്ചു. 2019 ആദ്യത്തിലാണ്​ സംവിധാനം പ്രവർത്തനക്ഷമമാകുക. 
ദുബൈയിൽ സംഘടിപ്പിച്ച ബോധവത്​കരണ യോഗത്തിലാണ്​ അതോറിറ്റി ഇക്കാര്യം പ്രഖ്യാപിച്ചത്​. എഫ്​.ടി.എ ഡയറക്​ടർ ജനറൽ ഖാലിദ്​ അലി ആൽ ബുസ്​താനിയുടെ നേതൃത്വത്തിൽ നടന്ന യോഗത്തിൽ പുകയില ഉൽപാദകർ, കയറ്റുമതിക്കാർ, എഫ്​.ടി.എ പ്രതിനിധികൾ, ബാങ്ക്​ നോട്ടുകളുടെയും പുകയില ഉൽപന്നങ്ങൾക്കുള്ള ഡിജിറ്റൽ സ്​റ്റാമ്പുകളുടെയും നിർമാണത്തിൽ വിദഗ്​ധരായ ഗ്ലോബൽ കമ്പനി അധികൃതർ തുടങ്ങിയവർ പ​െങ്കടുത്തു. 
പുകയില ഉൽപന്ന കമ്പനികളുമായി ആശയവിനിമയം നടത്താനും ഡിജിറ്റൽ ടാക്​സ്​ സ്​റ്റാമ്പ്​ വികസിപ്പിക്കുന്നതിന്​ ഗ്ലോബൽ കമ്പനിയുമായി ചേർന്ന്​ പ്രവർത്തന പദ്ധതി തയാറാക്കുന്നതിനും വേണ്ടിയാണ്​ യോഗം ചേർന്നത്​. 

സിഗററ്റുകളിലായിരിക്കും ഡിജിറ്റൽ ടാക്​സ്​ സ്​റ്റാമ്പ്​ സംവിധാനം ആദ്യം അവതരിപ്പിക്കുക. പിന്നീട്​ എല്ലാ പുകയില ഉൽപന്നങ്ങൾക്കും ബാധകമാക്കും. 
ഉൽപന്നങ്ങളിൽ ഒട്ടിച്ച ഡിജിറ്റൽ സ്​റ്റാമ്പ്​ വഴി അധികൃതർക്ക്​ ​നിരീക്ഷണം നടത്താനും ട്രാക്ക്​ ചെയ്യാനും സാധിക്കും. നികുതിവെട്ടിപ്പിനെതിരെ നടപടിയെടുക്കാനും പരിശോധനകൾ എളുപ്പത്തിലാക്കാനും വിപണി നിരീക്ഷണവിധേയമാക്കാനും ഇൗ സംവിധാനം ഉപകരിക്കും.

പുകയില ഉൽപന്നങ്ങളിൽ ഒട്ടിച്ചിരിക്കുന്ന ഡിജിറ്റൽ ടാക്​സ്​ സ്​റ്റാമ്പുകൾ എഫ്​.ടി.എയുടെ വിവരശേഖരത്തിൽ രജിസ്​റ്റർ ​െചയ്​തിരിക്കും. പ്രത്യേക സംവിധാനം ഉപയോഗിച്ച്​ വായിക്കാൻ കഴിയുന്ന നികുതി സംബന്ധമായ വിവരങ്ങൾ അടങ്ങിയതായിരിക്കും സ്​റ്റാമ്പ്​. 
പുതിയ സംവിധാനത്തിന്​ അനുസൃതമായ നടപടികൾ സ്വീകരിക്കാനും സംവിധാനം നടപ്പാക്കാൻ അതോറിറ്റിയോട്​ സഹകരിക്കാനും എക്​സൈസ്​ നികുതി ബാധകമായ പുകയില ഉൽപാദകരോടും വിതരണക്കാരോടും എഫ്​.ടി.എ ഡയറക്​ടർ ജനറൽ ആവശ്യപ്പെട്ടു. 
ആഗോള നിലവാരത്തിലുള്ള നികുതി സംവിധാനമാണ്​ യു.എ.ഇ നടപ്പാക്കിയിരിക്കുന്നതെന്നും അദ്ദേഹം കൂട്ടിച്ചേർത്തു.