ഫ്രീക്കൻ വാഹനങ്ങളെ അണിനിരത്തി കന്തൂറ റാലി

അറബ്​ പുരുഷന്മാരുടെ പരമ്പരാഗത വേഷമാണ്​ കന്തൂറ. കാലമെത്ര മാറിയാലും ഫാഷൻ എത്ര വന്നാലും കന്തൂറ വിട്ടൊരു കളി അവർക്കില്ല. കാറുകളെയും ബൈക്കുകളെയും 'ഫ്രീക്കന്മാരാക്കി' ദുബൈ വീഥികളിൽ അണിനിരത്തിയപ്പോഴും ഈ ശീലം മാറ്റമില്ലാതെ നിന്നു. വാഹനം എത്ര മോഡേൺ ആണെങ്കിലും ഓടിക്കുന്നയാൾ കന്തൂറ ധരിക്കണമെന്ന നിബന്ധനയോടെ നടന്ന റാലിയുടെ പേരും മറ്റൊന്നല്ല-കന്തൂറ റാലി. നൂറിലധികം സൂപ്പർ കാറുകളുകളും ബൈക്കുകളുമാണ്​ കന്തൂറ റാലിയിലൂടെ ദുബൈയിലെ വാഹനപ്രേമിക​ളെ ഞെട്ടിച്ചത്​.

ദുബൈ ഓട്ടോഡ്രോമിൽ നിന്നാരംഭിച്ച റാലിയിൽ അണിനിരന്നത്​ ചില്ലറക്കാരല്ല. ഹമ്മർ, മിനി കൂപ്പർ, പോർഷെ, മാസെറാറ്റി, മസ്റ്റാങ്​ എന്നിവയൊക്കെ റാലിയിൽ പ​ങ്കെടുത്തു. പൂർണമയാും വൈദ്യുതിയിൽ ​പ്രവർത്തിക്കുന്ന ഹമ്മർ ആയിരുന്നു റാലിയിലെ താരം. ഫ്യൂച്ചർ മ്യൂസിയം, മെയ്​ദാൻ പാലം തുടങ്ങി ദുബൈയിലെ ഐക്കണുകളൊക്കെ സന്ദർശിച്ച്​ സിലിക്കൺ ഒയാസിസിലെ ഡിജിറ്റൽ പാർക്കിലാണ്​ റാലി അവസാനിച്ചത്​. അവിടെ 200ഓളം മോഡിഫൈ ചെയ്ത സൂപ്പർ കാറുകളും കഥകളുറങ്ങുന്ന ക്ലാസിക്​ കാറുകളും പ്രദർശിപ്പിച്ചിരുന്നു.

'ജോക്കർ' സിനിമയിൽ നിന്ന്​ പ്രചോദനമുൾക്കൊണ്ട്​ യു.എ.ഇ സ്വദേശിയായ വലീദ്​ ഡിസൈൻ ചെയ്ത ഡോഡ്ജ്​ കാർ ഏറെ പേരെ ആകർഷിച്ചു. ലൈറ്റ്​ അടിക്കുമ്പോൾ ജോക്കറിന്‍റെ കണ്ണുകൾ തിളങ്ങുന്ന രീതിയിലാണ്​ വലീദ്​ കാർ ഒരുക്കിയത്​. ബെസ്റ്റ്​ എയർബ്രഷ്​ കാർ അവാർഡും മോഡിഫൈഡ്​ സലൂൺ കാറ്റഗറിയിൽ ഒന്നാം സ്ഥാനവും ഈ കാർ നേടുകയും ചെയ്തു. യു.എ.ഇ സ്വദേശിയായ അബ്​ദുല്ല മൂന്ന്​ വർഷമെടുത്ത്​ ഡിസൈൻ ചെയ്ത 'അവതാർ' കാറും ശ്രദ്ധ നേടി. ദുബൈ പൊലീസിന്‍റെ സൂപ്പർ കാറുകളും റാലിയിൽ അണിനിരന്നു. 25,000 ദിർഹത്തിന്‍റെ സമ്മാനങ്ങളാണ്​ വിജയികൾക്കായി ഒരുക്കിയിരുന്നത്​.