ദുബൈ ഇന്‍റർസിറ്റി ബസുകളിൽ സൗജന്യ വൈഫൈ; ഇ ആൻഡുമായി കൈകോർത്താണ്​ ആർ.ടി.എ പദ്ധതി നടപ്പാക്കിയത്​​

ദുബൈ: പ്രമുഖ ടെലഫോൺ സേവന ദാതാക്കളായ ഇ ആൻഡുമായി കൈകോർത്ത്​ ദുബൈയിലെ ഇന്‍റർസിറ്റി ബസുകളിൽ സൗജന്യ വൈ ഫൈ സേവനം ലഭ്യമാക്കുന്ന പദ്ധതി പൂർത്തീകരിച്ചതായി ദുബൈ റോഡ്​ ഗതാഗത അതോറിറ്റി (ആർ.ടി.എ) അറിയിച്ചു.

ദുബൈ, ഷാർജ, അബൂബദി, അജ്​മാൻ, ഫുജൈറ എമിറേറ്റുകൾക്കിടയിൽ സർവിസ്​ നടത്തുന്ന 259 ഇന്‍റർസിറ്റി ബസുകളിലാണ്​ വൈ ഫൈ സേവനം ലഭ്യമാക്കിയത്​. ഈ റൂട്ടുകളിൽ സഞ്ചരിക്കുന്നവരുടെ യാത്ര അനുഭവം കൂടുതൽ മെച്ചപ്പെടുത്തുന്നതിന്‍റെ ഭാഗമായാണ്​ നടപടി. സ്മാർട്ട്​ഫോണോ ടാപ്​ലറ്റുകളോ ലാപ്​ടോപ്പോ ഉപയോഗിച്ച്​ യാത്രയിലുടനീളം തടസ്സമില്ലാത്ത ഇന്‍റർ​നെറ്റ്​ സേവനം യാത്രക്കാർക്ക്​ ആസ്വദിക്കാം.

ബിസിനസ്​ ആവശ്യങ്ങൾക്കും മറ്റുമായി പോകുന്നവർക്ക്​ ബസ്​ യാത്രക്കിടയിൽ ജോലികൾ പൂർത്തീകരിക്കാൻ പുതിയ സംവിധാനം സഹായകരമാവും. തങ്ങളുടെ സേവനങ്ങളിലുടനീളം ഡിജിറ്റൽവത്​കരണം നടപ്പിലാക്കുകയെന്ന ശ്രമങ്ങളുടെ ഭാഗമാണ്​ പുതിയ സംരംഭമെന്ന്​ ആർ.ടി.എ അറിയിച്ചു. സമൂഹത്തിലെ എല്ലാ മേഖലയിലുമുള്ളവരുടെയും ആവശ്യങ്ങൾ നിറവേറ്റപ്പെടുന്നുണ്ടെന്ന്​ ഉറപ്പുവരുത്തുകയാണ്​ ലക്ഷ്യം​.

യു.എ.ഇയുടെ ഡിജിറ്റൽ ഗവൺമെന്‍റ്​ സ്​ട്രാറ്റജിയോട്​ ചേർന്ന്​ നിൽക്കുന്നതാണ്​ സംരംഭം. ബസ്​ യാത്ര കൂടുതൽ ആസ്വാദ്യകരും ഉത്​പാദനക്ഷവുമാക്കുന്നതിലൂടെ പ്രതിദിന യാത്രകൾ വർധിക്കുമെന്നാണ്​ കണക്ക്​ കൂട്ടൽ. അതോടൊപ്പം ലോകത്തെ ഏറ്റവും സ്മാർട്ടും സന്തോഷകരവുമായ നഗരമായി മാറുകയെന്ന ദുബൈയുടെ അഭിലാഷങ്ങളെ പിന്തുണക്കുന്നതാണ്​ പുതിയ നീക്കമെന്നും ആർ.ടി.എ പ്രസ്താവനയിൽ വ്യക്​തമാക്കി. സമുദ്ര ഗതാഗത മാർഗങ്ങളിൽ യാത്ര ചെയ്യുന്നവർക്കും സൗജന്യ വൈ ഫൈ സേവനം ലഭിക്കും.