വാക്​സിനെടുത്ത വിദ്യാർഥികൾക്കും അധ്യാപകർക്കും പി.സി.ആർ പരിശോധന സൗജന്യം

ദുബൈ: യു.എ.ഇയിൽ വാക്​സിനെടുത്ത വിദ്യാർഥികൾക്കും അധ്യാപകർക്കും വിദ്യാഭ്യാസ രംഗത്തെ മറ്റുജീവനക്കാർക്കും പി.സി.ആർ പരിശോധന സൗജന്യമാക്കി.

ഓരോ 30 ദിവസത്തിനിടയിലുമാണ്​ പരിശോധന സൗജന്യമായി ലഭിക്കുകയെന്ന്​ ദേശീയ ദുരന്തനിവാരണ അതോറിറ്റി അറിയിച്ചു.

പുതിയ അക്കാദമിക വർഷം ആരംഭിക്കുകയും വിദ്യാർഥികൾക്കും വിദ്യാഭ്യാസരംഗത്തുള്ളവർക്കും കൃത്യമായ ഇടവേളകളിൽ പല എമിറേറ്റുകളിലും പി.സി.ആർ പരിശോധന നിർബന്ധമാക്കുകയും ചെയ്​ത സാഹചര്യത്തിലാണ്​ അതോറിറ്റിയുടെ തീരുമാനം.

അബൂദബി അടക്കമുള്ള എമിറേറ്റുകളിൽ കൃത്യമായ ഇടവേളകളിൽ സ്​കൂളിൽ പ്രവേശിക്കുന്നതിന്​ പി.സി.ആർ പരിശോധന നടത്തണം. 12 വയസ്സിന്​ മുകളിലുള്ളവർ വാക്​സിനെടുത്തവരല്ലെങ്കിൽ ക്ലാസിൽ ഹാജരാകുന്നതിന്​ എല്ലാ ആഴ്​ചയും പി.സി.ആർ എടുക്കണം​.

വാക്​സിനെടുത്തവരും 12 വയസ്സിൽ താഴെയുള്ള വാക്​സിനെടുക്കാത്തവരും മാസത്തിലൊരിക്കൽ പി.സി.ആർ എടുക്കണം. സർക്കാർ സ്​കൂളുകളിലെ വിദ്യാർഥികൾക്ക്​ മാത്രമാണ്​ പ്രോ​ട്ടോകോൾ ബാധകം​. ഇവിടങ്ങളിൽ കഴിഞ്ഞ ആഴ്​ച സ്​കൂൾ തുറക്കുന്നതിന്​ മുന്നോടിയായി പി.സി.ആർ ടെസ്​റ്റിന്​ വൻ തിരക്ക്​ അനുഭവപ്പെട്ടിരുന്നു. പി.സി.ആർ ടെസ്​റ്റിന്​ സർക്കാർ ആരോഗ്യസേവന കേന്ദ്രങ്ങളിൽ 50 ദിർഹമാക്കി ചുരുക്കുകയുമുണ്ടായി.

ദുബൈയിൽ സ്വകാര്യ സ്​കൂൾ പ്രവേശനത്തിന്​ വാക്​സിൻ സ്വീകരിക്കണ​മെന്നോ നി​ശ്ചിത ഇടവേളകളിൽ പി.സി.ആർ പരിശോധന നടത്തണമെന്നോ മാനദണ്ഡമല്ല. സ്​കൂൾ തുറക്കുന്നതിന്​ നിയന്ത്രണങ്ങൾ തീരുമാനിക്കാൻ വിവിധ എമിറേറ്റുകൾക്ക്​ വിദ്യാഭ്യാസ വകുപ്പ്​ അനുവാദം നൽകിയിരുന്നു. ഇതി​െൻറ അടിസ്​ഥാനത്തിലാണ്​ ദുബൈ പി.സി.ആർ ഒഴിവാക്കിയത്​.

നിലവിൽ യു.എ.ഇയി​ലെ 90 ശതമാനം വിദ്യാഭ്യാസരംഗത്തെ ജീവനക്കാരും വാക്​സിൻ സ്വീകരിച്ചിട്ടുണ്ട്​. 36 ശതമാനം വിദ്യാർഥികളും കുത്തിവെപ്പെടുത്തു. നിലവിൽ സ്​കൂളുകളിൽ ഓൺലൈൻ പഠനവും നേരിട്ട്​ ക്ലാസിലെത്തിയുള്ള പഠനവും തുടരുന്നുണ്ട്​.

കോവിഡ്​ കുറഞ്ഞ സാഹചര്യത്തിൽ കുട്ടികളിൽ വലിയ ശതമാനം നേരിട്ട്​ ക്ലാസിലെത്തിയാണ്​ പഠിക്കുന്നത്​.

ഒക്​ടോബർ മൂന്നു മുതൽ ദുബൈയിൽ പൂർണമായും നേരിട്ട്​ ക്ലാസിലെത്തുന്ന സംവിധാനത്തിലേക്ക്​ മാറും.