സൗജന്യ മെഡിക്കൽ ക്യാമ്പ്

ഷാർജ: സെന്‍റ് ഗ്രിഗോറിയോസ് ഓർത്തഡോക്സ് പള്ളിയുടെ ചാരിറ്റി കമ്മിറ്റി ആഭിമുഖ്യത്തിൽ, ഓർത്തഡോക്സ് ചർച്ച് മെഡിക്കൽ ഫോറത്തിന്‍റെയും മാനേജിങ് കമ്മിറ്റിയുടെയും സഹകരണത്തോടെ തൊഴിലാളികൾക്കായി സൗജന്യ മെഡിക്കൽ ക്യാമ്പ് സംഘടിപ്പിച്ചു. ഷാർജ സജ ഏരിയയിലെ ഷഹാർക്കോ കൺസ്ട്രക്ഷൻ കമ്പനി തൊഴിലാളികളുടെ താമസ ഏരിയയിൽ നടന്ന ക്യാമ്പിന് എൻ.എം.സി മെഡിക്കൽ സെന്‍ററാണ് നേതൃത്വം നൽകിയത്. തൊഴിലാളികൾക്ക് പ്രഷർ, ഷുഗർ പരിശോധന, മികച്ച ഡോക്ടർമാരുടെ സേവനം എന്നിവ സജ്ജീകരിച്ചിരുന്നു. ഇരുനൂറിൽപരം തൊഴിലാളികൾ സേവനം പ്രയോജനപ്പെടുത്തി. ഇടവ വികാരി ഫാ. ഫിലിപ് എം. സാമുവേൽ കോർ എപ്പിസ്‌കോപ്പ, സഹ വികാരി ഫാ. റിജോ തോമസ് രാജൻ, ചാരിറ്റി സെക്രട്ടറി ബിനോ സാമുവേൽ, ട്രഷറർ മനോജ് പോൾ, ചാരിറ്റി കമ്മിറ്റി അംഗങ്ങൾ, മാനേജിങ് കമ്മിറ്റി ട്രസ്റ്റി മാത്യു ഐസക്, മാനേജിങ് കമ്മിറ്റി അംഗങ്ങൾ എന്നിവർ പങ്കെടുത്തു.