എക്​സ്​പോ നഗരിയിലേക്ക്​ ദുബൈയിൽ നിന്ന്​ സൗജന്യ ബസ്​ സർവീസ്​

ദുബൈ: എക്​സ്​പോ നഗരിയിലേക്ക്​ സൗജന്യമായെത്താൻ ദുബൈ റോഡ്​സ്​ ആൻഡ്​ ട്രാൻസ്​പോർട്ട്​ അതോറിറ്റി വഴിതെളിക്കുന്നു. ഒമ്പത്​ ലൊക്കേ​ഷനിൽ നിന്നാണ്​ എക്​സ്​പോയിലേക്ക്​ സൗജന്യ സർവീസ്​ ഒരുക്കിയിരിക്കുന്നത്​. ഇതിനായി 'എക്​സ്​പോ റൈഡർ' എന്ന പേരിൽ 126 ബസുകൾ നിരത്തിലിറക്കും. ദുബൈയുടെ വിവിധ ഭാഗങ്ങളിൽ നിന്നായിരിക്കും സർവീസ്​. ഇതിന്​ പുറമെ ഹോട്ടലുകളിൽ നിന്നുള്ളവരെ എക്​സ്​പോയിലെത്തിക്കാനും ബസുകൾ ഏർപെടുത്തും. പാർക്കിങ്​ ഏരിയയിൽ നിന്ന്​​ യാത്രക്കാരെ എക്​സ്​പോ ഗേറ്റിലേക്കെത്തിക്കാനും ബസ്​ ഉണ്ടാകും. ഫെറി വഴി വരുന്നവർക്ക്​ വേണ്ടിയും പ്രത്യേക ബസ്​ ഏർപെടുത്തും. ശനി മുതൽ വ്യാഴം വരെ എല്ലാ ദിവസവും 1956 സർവീസ്​ നടത്തും. വ്യാഴം, വെള്ളി ദിനങ്ങളിൽ ഇത്​ 2203 ആയി ഉയരും. മൂന്ന്​ മിനിറ്റ്​ മുതൽ 60 മിനിറ്റ്​ വരെ ഇടവിട്ടായിരിക്കും സർവീസ്​.

എക്​സ്​പോയ​ിലേക്ക്​ യാത്രക്കാരെ സ്വീകരിക്കാൻ തയാറാണെന്ന്​ ആർ.ടി.എ എക്​സിക്യൂട്ടീവ്​ ​ഡയറക്​ടർ ബോർഡ്​ ചെയർമാൻ മത്താർ മുഹമ്മദ്​ അൽതായർ പറഞ്ഞു. ഉയർന്ന സുരക്ഷയും ആഡംബര നിലവാരവുമുള്ള ബസുകളാണ്​ ഇതിനായി ഇറക്കിയിരിക്കുന്നത്​. കാർബൺ ബഹിർഗമനം കുറഞ്ഞ യൂറോ 6 മാനദണ്ഡങ്ങൾ പാലിക്കുന്ന ബസുകളാണിവ. മിഡ്​ൽ ഈസ്​റ്റ്​- നോർത്ത്​ ആഫ്രിക്ക മേഖലയിൽ ആദ്യമായാണ്​ ഇത്തരമൊരു ബസ്​ സർവീസ്​ നടത്തുന്നത്​.

പാർക്കിങ്​ ഏരിയയിൽ നിന്ന്​ മൂന്ന്​ ഗേറ്റുകളിലേക്കാണ്​ സർവീസ്​. ഓപർച്യൂണിറ്റി, മൊബിലിറ്റി, സസ്​റ്റൈനബിലിറ്റി എന്നീ പവലിയനുകളിലേക്ക്​ ഈ സർവീസുകൾ വഴി നേരി​ട്ടെത്താം. ഇതിനായി 57 ബസുകളുണ്ട്​. ദിവസവും 1191 ട്രിപ്പ്​ നടത്തം. മൂന്ന്​ മുതൽ ഏഴ്​ വരെ മിനിറ്റുകൾ ഇടവിട്ടായിരിക്കും സർവീസ്​.

മറ്റ്​ എമിറേറ്റുകളിൽ നിന്നുള്ള സർവീസുകൾ നേരത്തെ പ്രഖ്യാപിച്ചിരുന്നു. അബൂദബി, അൽ ഐൻ, ഫുജൈറ, അജ്​മാൻ, റാസൽഖൈമ എന്നിവിടങ്ങളിൽ നിന്നാണ്​ ബസുകൾ സർവീസ്​ നടത്തുന്നത്​. ഈ സർവീസുകൾ സൗജന്യമല്ല. 77 ബസുകളാണ്​ ഇതിനായി ഏർപെടുത്തിയിരിക്കുന്നത്​. ദിവസവും 193 സർവീസ്​ നടത്തും. അവധി ദിവസങ്ങളിൽ ഇത്​ 213 ആയി ഉയരും.

സൗജന്യ ബസ്​ സർവീസ്​ എവിടെ നിന്നെല്ലാം:

1. പാം ജുമൈറ: ആറ്​ ബസുകൾ 54 സർവീസ്​ നടത്തും. 15 മിനിറ്റ്​ ഇടവിട്ട്​ സർവീസ്​.

2. അൽ ബർഷ: ഏഴ്​ ബസുകൾ 62 സർവീസ്​ നടത്തും. 30 മിനിറ്റ്​ ഇടവിട്ട്​ സർവീസ്​.

3. അൽ ഗുബൈബ: 12 ബസുകൾ 74 സർവീസ്​ നടത്തും. 15 മിനിറ്റ്​ ഇടവിട്ട്​ സർവീസ്​.

4. ഇത്തിസാലാത്ത്​: എട്ട്​ ബസ്​ 70 സർവീസ്​ നടത്തും. 30 മിനിറ്റ്​ ഇടവിട്ട്​ സർവീസ്​.

5. ​േഗ്ലാബൽ വില്ലേജ്​: മൂന്ന്​ ബസ്​ പത്ത്​ സർവീസ്​ നടത്തും. ഓരോ മണിക്കൂറിലും സർവീസ്​.

6, 7. ഇൻറർനാഷനൽ സിറ്റി, സിലിക്കൺ ഒയാസീസ്​: എട്ട് ബസുകൾ 78 സർവീസ്​ നടത്തും. 15 മിനിറ്റ്​ ഇടവിട്ട്​ സർവീസ്.​

8. ​ദുബൈ മാൾ: അഞ്ച്​ ബസുകൾ 55 സർവീസ്​ നടത്തും. 30 മിനിറ്റ്​ ഇടവിട്ട്​ സർവീസ്​.

9. ദുബൈ എയർപോർട്ട്​: എട്ട്​ ബസ്​ 52 സർവീസ്​ നടത്തും. 20 മിനിറ്റ്​ ഇടവിട്ട്​ സർവീസ്​.