ഒമാനിൽ വാഹനാപകടം; മുൻ യു.എ.ഇ സൈനികൻ മരിച്ചു

ദുബൈ: യു.എ.ഇയിൽ നിന്ന്​ ഒമാനിലെ സലാലയിലേക്ക്​ വാരാന്ത്യ അവധി ആഘോഷിക്കാൻ പോയ ഇമാറാത്തി കുടുംബം സഞ്ചരിച്ച വാഹനം അപകടത്തിൽപ്പെട്ട്​ മുൻ യു.എ.ഇ സൈനികൻ മരിച്ചു. ഒമാനിലെ ഹൈമ റോഡിൽ ശനിയാഴ്ചയായിരുന്നു ദുരന്തം. 70 കാരനായ മുൻ സൈനികൻ മുഹമ്മദ്​ ഫറജ്​ ആണ്​ മരണപ്പെട്ടത്​. അപകടത്തിൽ ഭാര്യക്ക്​ ഗുരുതരമായി പരിക്കേറ്റു.

ഇവരെ ഒമാനിലെ ആശുപത്രിയിൽ പ്രവേശിപ്പിച്ചിരിക്കുകയാണ്​. മകൾക്ക്​ പരിക്കില്ല. കുടുംബം സഞ്ചരിച്ച എസ്​.യു.വി കാർ എതിർ ദിശയിൽ നിന്ന്​ വന്ന ഒമാനി പൗരന്‍റെ വാഹനവുമായി കൂട്ടിയിടിക്കുകയായിരുന്നു. അപകടത്തിൽ ഇയാളും മരണപ്പെട്ടു. ശനിയാഴ്ച വൈകിട്ട്​ നാലു മണിയോടെയാണ്​ അപകട വിവരം അറിഞ്ഞതെന്ന്​ ഫറജിന്‍റെ മറ്റൊരു മകനായ സാബ്​രി അൽ തമീമിയെ ഉദ്ധരിച്ച്​ പ്രാദേശികൾ മാധ്യമങ്ങൾ റിപോർട്ട്​ ചെയ്തു. ഇദ്ദേഹം അടക്കം ഫറജിന്​ ആറു മക്കളാണുള്ളത്​.