550 കോടി ദിർഹം ചെലവിട്ട്​ ഭക്ഷ്യ​പാർക്ക്​ ഒരുക്കുന്നു

ദുബൈ: ഭക്ഷ്യവൈവിധ്യങ്ങളുടെ സംഗമസ്​ഥാനമായ ദുബൈ ഗൾഫ്​ മേഖലയിലെ ഭക്ഷ്യവ്യവസായത്തി​​​െൻറ ആസ്​ഥാനമാവാൻ ഒരുങ്ങുന്നു.   550 കോടി ദിർഹം ചെലവിൽ ദുബൈ ഹോൾസെയിൽ സിറ്റിയിൽ 55 ലക്ഷം ചതുരശ്ര അടി വലിപ്പമുള്ള ഫൂഡ്​ പാർക്ക്​ നടപ്പാക്കുന്ന പദ്ധതി യു.എ.ഇ വൈസ്​പ്രസിഡൻറും പ്രധാനമന്ത്രിയും ദുബൈ ഭരണാധികാരിയുമായ ശൈഖ്​ മുഹമ്മദ്​ ബിൻ റാശിദ്​ ആൽ മക്​തൂം പ്രഖ്യാപിച്ചു. ഭക്ഷ്യമേഖലയുമായി ബന്ധപ്പെട്ട എല്ലാ വിധ വ്യവസായങ്ങൾക്കും മൂല്യവർധിത പ്രവർത്തനങ്ങൾക്കും ഇവിടെ സൗകര്യമൊരുങ്ങും. അത്യാധുനിക ഭക്ഷ്യവ്യവസായങ്ങൾക്ക്​ ഏറ്റവും മികച്ച ഇടമായി ദുബൈ മാറും. 

ഭക്ഷ്യ വസ്​തുക്കൾ സംഭരിക്കാനും സംസ്​കരിക്കാനും പാക്കു ചെയ്യാനും വിൽപനക്കെത്തിക്കാനും എല്ലാ വിധ സൗകര്യങ്ങളുമൊരുക്കും. ഭക്ഷ്യ പരിശോധന, സാമ്പത്തിക ഇടപാടുകൾ, കസ്​റ്റംസ്​ അനുമതി എന്നിവയും ഇവിടെ തന്നെ ലഭ്യമാക്കും.  നിലവിൽ 1300 കോടി ദിർഹമാണ്​ ദുബൈയിലെ ഭക്ഷ്യമേഖലയിലെ വിറ്റുവരവ്​. 2030 ആകു​േമ്പാൾ അത്​ 2300 കോടി ദിർഹമാകും എന്നാണ്​ കണക്കു കൂട്ടൽ. 18400 ബ്ലൂ കോളർ ജോലിക്കാർക്കും 4600 വൈറ്റ്​ കോളർ​ ജോലിക്കാർക്കും തൊഴിലവസരങ്ങൾ ലഭ്യമാക്കും എന്നതാണ്​ പാർക്കി​​​െൻറ പ്രധാന സവിശേഷത. കര, കടൽ, വ്യോമ മാർഗത്തിൽ എളുപ്പം എത്താനാകുമെന്നതും ഭക്ഷ്യപാർക്കിലേക്ക്​ ആഗോള വ്യവസായികളെ ആകർഷിക്കും.