അഞ്ച്​ ആർ.ടി.എ സേവനങ്ങൾ സ്​മാർട്ട്​ പ്ലാറ്റ്​ഫോം വഴി

ദുബൈ: ദുബൈ റോഡ്​ ആൻഡ്​ ട്രാൻസ്​പോർട്ട്​ ​അതോറിറ്റിയുടെ (ആർ.ടി.എ) അഞ്ചു​ സേവനങ്ങൾ ഉടൻ സ്​മാർട്ട്​ പ്ലാറ്റ്​ഫോമിലേക്കു​ മാറും. ലൈസൻസിങ്​ സർട്ടിഫിക്കറ്റുമായി ബന്ധപ്പെട്ട സേവനങ്ങളാണ്​ സ്​മാർട്ടാക്കാനൊരുങ്ങുന്നത്​. ഇൻഷുറൻസ്​ റീഫണ്ട്​, വാഹന ഉടമസ്​ഥാവകാശം, വാഹന ഉടമസ്​ഥാവകാശം റദ്ദാക്കൽ, ക്ലിയറൻസ്​, പിഴ അടക്കൽ തുടങ്ങിയവയുടെ സർട്ടിഫിക്കറ്റ്​ ​സേവനമാണ്​ പൂർണമായും സ്​മാർട്ടാവുന്നത്​.

ഉപഭോക്താക്കൾക്ക്​ www.rta.ae എന്ന വെബ്​സൈറ്റ്​ വഴിയോ ദുബൈ ഡ്രൈവ്​ (Dubai Drive) ആപ്​​ വഴിയോ സ്​മാർട്ട്​ കിയോസ്​കുകൾ വഴിയോ സർട്ടിഫിക്കറ്റുമായി ബന്ധപ്പെട്ട അപേക്ഷകൾ സമർപ്പിക്കാം. 8009090 എന്ന കാൾ സെൻറർ നമ്പറിലും സേവനം ലഭിക്കും. വാഹനങ്ങളുടെ കൈവശ സർട്ടിഫിക്കറ്റ്​, എക്​സ്​പോർട്ട്​ സർട്ടിഫിക്കറ്റ്​ എന്നിവയും ഈ വർഷം സ്​മാർട്ട്​​ ​പ്ലാറ്റ്​ഫോമിനു​ കീഴിലേക്ക്​ കൊണ്ടുവരും. യു.എ.ഇയിലെ സർക്കാർ സേവനങ്ങൾ പൂർണമായും കടലാസ്​രഹിതമാക്കാനുള്ള പദ്ധതിയുടെ ഭാഗമായാണ്​ കൂടുതൽ സേവനങ്ങൾ സ്​മാർട്ടാക്കുന്നത്​.

ലോകത്തിലെ ഏറ്റവും സ്​മാർട്ട്​ നഗരമെന്ന യു.എ.ഇയുടെ ലക്ഷ്യത്തിലേക്കുള്ള കുതിപ്പി​െൻറ ഭാഗമാണ്​ നടപടിയെന്ന്​ ആർ.ടി.എ വെഹിക്ക്​ൾ ലൈസൻസിങ്​ ഡയറക്​ടർ ജമാൽ ഹാഷിം അൽ സദഹ്​ പറഞ്ഞു.