​50 ഡിഗ്രി കടന്ന്​ രാജ്യത്ത്​ റെക്കോഡ്​ ചൂട്​

ദുബൈ: രാജ്യത്ത്​ 50 ഡിഗ്രി കടന്ന്​ ചൂട്​. അബൂദബിയിലെ അൽ ശവാമിഖ്​ എന്ന സ്ഥലത്ത്​ വെള്ളിയാഴ്ച ഉച്ച 2.30നാണ്​ 50.4 ഡിഗ്രി എന്ന റെക്കോഡ്​ ചൂട്​ രേഖപ്പെടുത്തിയത്​. 2003ൽ താപനില രേഖപ്പെടുത്തുന്നത്​ ആരംഭിച്ചതിനുശേഷം മേയ്​ മാസത്തിൽ അടയാളപ്പെടുത്തിയ ഏറ്റവും വലിയ ചൂടാണിതെന്ന്​ ദേശീയ കാലാവസ്ഥ നിരീക്ഷണ കേന്ദ്രം അറിയിച്ചു.

2009ൽ രേഖപ്പെടുത്തിയ 50.2 ഡിഗ്രി ചൂടാണ്​ അവസാനമായി മേയിൽ രേഖപ്പെടുത്തിയ ഏറ്റവും വലിയ ചൂട്​.വേനൽ മാസങ്ങളിൽ കനത്ത താപനിലക്ക്​ സാധ്യതയുള്ള രാജ്യത്ത്, സീസൺ ആരംഭിക്കുന്നതിന് മുമ്പുതന്നെ സാധാരണയേക്കാൾ ഉയർന്ന താപനിലയാണ്​ ഈ വർഷം രേഖപ്പെടുത്തിയിരിക്കുന്നത്​.

കഴിഞ്ഞ മാസം യു.എ.ഇയിലെ ഏറ്റവും ചൂടേറിയ ഏപ്രിൽ മാസമായിരുന്നു. ശരാശരി പ്രതിദിന ഉയർന്ന താപനില 42.6 ഡിഗ്രി വരെ ഏപ്രിലിൽ എത്തിയിരുന്നു. 2017 ഏപ്രിലിൽ രേഖപ്പെടുത്തിയ ശരാശരി പ്രതിദിന താപനിലയായ 42.2 ഡിഗ്രി സെൽഷ്യസിനെ മറികടന്നതാണ്​ ഇത്​ റെക്കോഡ്​ ചൂടായത്. 2003 മുതൽ താപനില സംബന്ധിച്ച്​ സമഗ്രമായ കണക്കുകൾ കാലാവസ്ഥ നിരീക്ഷണ കേന്ദ്രം സൂക്ഷിക്കുന്നുണ്ട്​.

ചൂട്​ കനത്ത സാഹചര്യത്തിൽ സുരക്ഷിതരായിരിക്കാൻ അധികൃതർ പൊതുജനങ്ങളോട്​ നിർദേശിച്ചു. വെയിലിൽനിന്ന് വിട്ടുനിൽക്കാനും ധാരാളം വെള്ളം കുടിക്കാനും ഉചിതമായ വസ്ത്രം ധരിക്കാനും സൺസ്‌ക്രീൻ ഉപയോഗിക്കാനും വിദഗ്​ധർ നിർദേശിക്കുന്നു. ചൂട്​ കനക്കുന്ന സാഹചര്യത്തിൽ വാഹനങ്ങൾ സുരക്ഷിതമാക്കാനും അധികൃതർ കാമ്പയിനുകളിലൂടെ ആവശ‍്യപ്പെടുന്നുണ്ട്​. ഷാർജ പൊലീസ്​ വേനൽക്കാല റോഡ്​ സുരക്ഷാ പരിശോധനകൾ ശക്​തമാക്കിയിട്ടുണ്ട്​. ടയർ പരിശോധിക്കാനും ചൂടുകാലത്തെ യാത്രക്ക്​ ഫിറ്റാണെന്ന്​ ഉറപ്പാക്കാനും അധികൃതർ ആവശ്യപ്പെട്ടു.