തീപിടിച്ച വീട്ടിനുള്ളിൽ ഇരട്ട സഹോദരിമാർ ശ്വാസംമുട്ടി മരിച്ചു

ദുബൈ: ദുബൈയിൽ വീടിനു തീപിടിച്ച്​ ഇരട്ട സഹോദരിമാർക്ക്​ ദാരുണ മരണം. ഖിസൈസിനടുത്ത അൽ ത്വവാർ 3 മേഖലയിൽ ചൊവ്വാഴ്​ച രാവിലെ 10.45 ഒാടെയാണ്​ നാടിനെ കണ്ണീരിലാഴ്​ത്തിയ സംഭവം. തീപിടിച്ച വീട്ടിൽ ശ്വാസം മുട്ടിയാണ്​ ഇരുവരും മരിച്ചത്​. 20 വയസ്​ പ്രായമുള്ള സഹോദരിമാരും ആറുമാസം പ്രായമുള്ള കുഞ്ഞു പെൺകുട്ടിയും വീട്ടുജോലിക്കാരിയും മാത്രമാണ്​ ഇൗ സമയം വീട്ടിലുണ്ടായിരുന്നത്​. പെൺകുട്ടികൾ ഒരു മുറിക്കുള്ളിൽ ഉറക്കമായിരുന്നു. കുഞ്ഞിനെ പരിപാലിച്ച്​ ഇതിനു സമീപത്തെ മുറിയിൽ നിന്നിരുന്ന ജോലിക്കാരി എ.സിയുടെ വയറിംഗിൽ നിന്ന്​ തീ പൊരി ചിതറുന്നതു കണ്ട്​  ഉടനടി ഒച്ചവെച്ച്​ ഇരുവരെയും ഉണർത്താൻ​ ശ്രമിച്ചു. എന്നാൽ ഇവരുടെ മുറവിളി മുറിക്കപ്പുറത്തേക്ക്​ എത്തിയില്ല. ഉടനെ കുഞ്ഞുമായി പുറത്തിറങ്ങിയ ഇവർ വീണ്ടും ഒച്ചവെക്കുകയും മറ്റുള്ളവരെ വിവരമറിയിക്കുകയും ചെയ്​തു. ഇൗ സമയം ചൂടുകൊണ്ട്​ ഞെട്ടിയുണർന്ന യുവതികൾ പുറത്തു കടക്കാൻ ശ്രമിച്ചപ്പോൾ പ്രധാന വാതിലി​​െൻറ ഭാഗം മൂടിക്കൊണ്ട്​ തീ ആളിത്തുടങ്ങിയിരുന്നു. ജനലിലൂടെ പുറത്തുചാടാൻ മാർഗമാരാഞ്ഞപ്പോൾ ഇരുമ്പു കമ്പികൾ അവിടെയും പ്രതിബന്ധമായി. തുടർന്ന്​ ഇരുവരും കുളിമുറിക്കുള്ളിൽ അഭയം​ ​പ്രാപിച്ചു. ഇതിനുള്ളിൽ പുക നിറഞ്ഞ്​ ശ്വാസം മുട്ടി സഹോദരിമാർ മരണത്തിന്​ കീഴടങ്ങുകയായിരുന്നു.  ചെറിയ തോതിലുള്ള തീ പിടിത്തമായിരുന്നുവെങ്കിലും വീട്ടിൽ രക്ഷാമാർഗങ്ങളൊന്നുമില്ലാഞ്ഞതാണ്​ ദുരന്തത്തിന്​ കാരണമായതെന്ന്​ സിവിൽ ഡിഫൻസ്​ ഉ​േദ്യാഗസ്​ഥർ പറഞ്ഞു. തീ പിടിത്തമറിച്ച്​ എത്തിയ അഗ്​നിശമന സേനാ അംഗങ്ങൾ അടിയന്തിര ശു​​​ശ്രൂഷകൾ നൽകിയെങ്കിലും മരണം സംഭവിക്കുകയായിരുന്നു.