ഒടുവിൽ ആശ്വാസം; ഒപ്പം ചില ആശങ്കകളും

ദുബൈ: യു.എ.ഇയിലേക്ക്​ മടങ്ങിയെത്താൻ കുറുക്കുവഴികൾ തേടുന്നതിനിടെയാണ്​ പ്രവാസികൾക്ക്​ ആശ്വാസമായി വിലക്ക്​ മാറിയ വാർത്ത എത്തിയത്​. രണ്ട്​ മാസത്തോളമായി അനുഭവിച്ചിരുന്ന മാനസിക സംഘർഷങ്ങൾക്കാണ്​ ഇതോടെ അറുതിയായത്​.

ഏപ്രിൽ 25നാണ്​ ഇന്ത്യയിൽനിന്നുള്ള യാത്രക്കാർക്ക്​ യു.എ.ഇ യാത്രാവിലക്ക്​ ഏർപ്പെടുത്തിയത്​. ആദ്യം പത്ത്​ ദിവസത്തേക്കാണ്​ വിലക്ക്​ ​ഏർപ്പെടുത്തിയിരുന്നതെങ്കിലും പിന്നീട്​ അനിശ്​ചിതമായി നീട്ടുകയായിരുന്നു.

ജൂലൈ ആറ്​ വരെ സർവിസ്​ ഉണ്ടാവില്ലെന്ന്​ എമിറേറ്റ്​സും എയർഇന്ത്യയും അറിയിച്ചതോടെ കാത്തിരിപ്പ്​ നീളുകയായിരുന്നു. ഇതിനിടെയാണ്​ അപ്രതീക്ഷിതമായി വിലക്ക്​ നീക്കിയ വാർത്ത എത്തിയത്​. ​വാക്​സിനേഷൻ സ്വീകരിച്ചവർക്ക്​ മാത്രമാണ്​ പ്രവേശനം നൽകുന്നതെങ്കിലും ഭൂരിപക്ഷം പേർക്കും ആശ്വാസം പകരുന്ന വാർത്തയാണിത്​. മടങ്ങിയെത്തിയില്ലെങ്കിൽ ജോലി നഷ്​ടമാകുമെന്ന അവസ്​ഥയിലുള്ളവരുണ്ട്​. കുട്ടികളും പ്രായമായ രക്ഷിതാക്കളും നാട്ടിൽ കുടുങ്ങിപ്പോയവരുണ്ട്​. വിസ കാലാവധി കഴിയാറായവരും നാട്ടിലുണ്ട്​. ഇവർക്കെല്ലാം പ്രതീക്ഷ നൽകുന്ന അനുഭാവപൂർണമായ നടപടിയാണ്​ യു.എ.ഇ കൈക്കൊണ്ടിരിക്കുന്നത്​.

അതേസമയം, നാട്ടിലെ വാക്​സിനേഷൻ നടപടികൾ മന്ദഗതിയിലാണെന്നത്​ ആശങ്കക്ക്​ വകവെക്കുന്നു.കേരളത്തിൽ പ്രവാസികൾക്ക്​ വാക്​സിനേഷൻ വേഗത്തിലാക്കാൻ നടപടിയെടുക്കുമെന്ന്​ മുഖ്യമന്ത്രി പിണറായി വിജയൻ അറിയിച്ചിരുന്നു. ഇത്​ ആശ്വാസം പകരുന്നുണ്ടെങ്കിലും ആദ്യ ഡോസ്​ എടുത്ത ശേഷം ദിവസങ്ങളോളം കാത്തിരിക്കണം അടുത്ത ഡോസ്​ ലഭിക്കാൻ. കേരളത്തിലെ അവസ്​ഥ മെച്ചമാണെങ്കിലും മറ്റ്​ സംസ്​ഥാനങ്ങളി​െല അവസ്​ഥ അതല്ല. ​അത്യാവശ്യ വിഭാഗത്തിൽപെട്ടവർക്ക്​ പോലും ​വടക്കേ ഇന്ത്യൻ സംസ്​ഥാനങ്ങളിൽ വാക്​സിൻ വിതരണം എത്തിയിട്ടില്ല. മാസങ്ങൾ കാത്തിരുന്നാലും ഈ സ്​ഥലങ്ങളിൽ പ്രവാസികൾക്ക്​ വാക്​സിൻ ലഭിക്കാൻ സാധ്യത കുറവാണ്​. യു.എ.ഇ അംഗീകരിച്ച വാക്​സിനുകൾക്കാണ്​ അനുമതി. സിനോഫാം, ആസ്​ട്രസെനഗ, ഫൈസർ, സ്​പുട്​നിക്​ എന്നിവയാണ്​ യു.എ.ഇ അംഗീകരിച്ചിരിക്കുന്നത്​.

ഇതിൽ ആസ്​ട്രസനഗയാണ്​ നാട്ടിൽ കോവിഷീൽഡ്​ എന്ന പേരിൽ വിതരണം ചെയ്യുന്നത്​. എന്നാൽ, കോവിഷീൽഡ്​ എടുത്തവർക്ക്​ ചില ഗൾഫ്​ രാജ്യങ്ങൾ ആദ്യം അനുമതി നൽകിയിരുന്നില്ല. യു.എ.ഇ ഇക്കാര്യത്തിൽ എന്ത്​ നിലപാടെടുക്കും എന്നതും നിർണായകമാണ്​.

വിസിറ്റ്​ വിസക്കാർക്ക്​ സന്ദർശനാനുമതി നൽകാത്തതും ആശങ്കക്കിടയാക്കുന്നുണ്ട്​. രണ്ട്​ ഡോസ്​ വാക്​സിനേഷൻ പൂർത്തീകരിച്ചവരാണെങ്കിലും റസിഡൻറ്​ വിസയില്ലാത്തവർക്ക്​ വരാൻ കഴിയില്ല. നാല്​ മണിക്കൂറിനുള്ളിൽ എടുത്ത റാപിഡ്​ പി.സി.ആർ പരിശോധന ഫലം വേണമെന്ന നിബന്ധനയും ആശങ്കയുണ്ടാക്കുന്നു. ഇൻറർനാഷനൽ യാത്രക്കാർ മൂന്ന്​ മണിക്കൂറിനുള്ളിൽ വിമാനത്താവളത്തിൽ റിപ്പോർട്ട്​ ചെയ്യണമെന്നാണ്​ നിബന്ധന. കേരളത്തിലെ വിമാനത്താവളത്തിനുള്ളിൽ റാപിഡ്​ പി.സി.ആർ ടെസ്​റ്റ്​ സൗകര്യമേർപ്പെടുത്തിയാൽ മാത്രമേ ഈ പ്രതിസന്ധി പരിഹരിക്കാൻ കഴിയൂ.