ഭീകരതക്കെതിരെ പൊരുതാനുറച്ച്​ ഫത്​വ കൗൺസിൽ 

അബൂദബി: തീ​വ്രവാദത്തിനും ഗുണരഹിതമായ ഫത്​വ (മതവിധി)കൾക്കുമെതിരെ തുറന്ന പോരാട്ടത്തിന്​ എമിറേറ്റ്​സ്​ ഫത്​വ കൗൺസിൽ ഒരുങ്ങുന്നു. ഇസ്​ലാമിക അധ്യപനങ്ങൾക്ക്​ വിരുദ്ധമായ ഫത്​വകൾ തടയാനും യഥാർഥവും സുന്ദരവുമായ ഇസ്​ലാമിക ജീവിത സാഹചര്യം സാധ്യമാക്കാനും ലക്ഷ്യമിട്ട്​ യു.എ.ഇ മന്ത്രിസഭാ തീരുമാന പ്രകാരം രൂപം നൽകിയ കൗൺസിലി​​​െൻറ ആദ്യയോഗത്തിനു ശേഷം ചെയർമാൻ ശൈഖ്​ അബ്​ദുല്ല ബിൻ ബയ്യയാണ്​ ഇക്കാര്യം വ്യക്​തമാക്കിയത്​. ഇസ്​ലാമിക മൂല്യങ്ങൾ പ്രചരിപ്പിക്കാനും തീവ്ര^ഭീകരവാദത്തെ ചെറുക്കാനുമാണ്​ തീരുമാനം. യുക്​തിരഹിതമായ ഫത്​വകൾ ഇസ്​ലാമിക രാജ്യങ്ങൾക്കും സമൂഹത്തിനും ഒ​േട്ടറെ ദോഷങ്ങൾ സൃഷ്​ടിക്കുന്നുണ്ട്​. രക്​തചൊരിച്ചിലിനും രാഷ്​ട്രങ്ങളുടെ തകർച്ചകൾക്കും ഇടയാക്കുന്ന ആ കെടുതി ഇല്ലാതാക്കുകയും സമാധാനത്തിനും സഹിഷ്​ണുതക്കും മുഖ്യസ്​ഥാനം നൽകുകയും വേണം. രാജ്യത്ത്​ പുറത്തിറക്കുന്ന ഫത്​വകളുടെയും അവസാന വാക്ക്​ കൗൺസിലായിരിക്കും. 

 മതത്തി​​​െൻറയോ നിറത്തി​​​െൻറയോ വംശത്തി​​​െൻറയോ പേരിൽ വിവേചനം പുലർത്തുന്നത്​ ​ക്രിമിനൽ കുറ്റമാക്കി നിയമനിർമാണം നടത്തിയ ആദ്യ അറബ്​ രാഷ്​ട്രമായ യു.എ.ഇ സഹിഷ്​ണുതയും  സൗഹാർദവും സംരക്ഷിക്കുന്നതിന്​ ഉന്നത സ്​ഥാനമാണ്​ നൽകുന്നത്​. 
പലരും തന്നിഷ്​ടപ്രകാരം ഫത്​വകളിറക്കുകയും അത്​ മൂലം മനുഷ്യർക്കിടയിൽ ഭിന്നിപ്പും തർക്കങ്ങളും ഉണ്ടായ സാഹചര്യങ്ങളാണ്​ കൗൺസിലിനെ അനിവാര്യമാക്കിയത്​. മുഫ്​തിക​െള പരിശീലിപ്പിക്കുന്ന കേന്ദ്രങ്ങളുടെ ചുമതലയും കൗൺസിലിനായിരിക്കുമെന്ന്​ അബൂദബി ഒൗഖാഫ്​ ചെയർമാൻ ഡോ. മുഹമ്മദ്​ മതാർ അൽ കഅ്​ബി വ്യക്​തമാക്കി. വിവിധ വിഷയങ്ങളിൽ പൊതു ഫത്​വയും വിവിധ സർക്കാർ ഏജൻസികളുടെ ആവശ്യാർഥമുള്ള ഫത്​വകളും കൗൺസിൽ പുറപ്പെടുവിക്കും. 

ഒൗഖാഫ്​ പ്രതിനിധി ഉമർ ഹബ്​തൂർ ദിബി, ദുബൈ ഒൗഖാഫ്​ പ്രതിനിധി അഹ്​മദ്​ അബ്​ദുൽ അസീസ്​ അൽ ഹദ്ദാദ്​, ഷാർജ ഇസ്​ലാമിക കാര്യ മന്ത്രാലയത്തിലെ സലീം മുഹമ്മദ്​ അൽ ദൂബി, ജനറൽ അതോറിറ്റിയിലെ ഷമ്മ യൂസുഫ്​ മുഹമ്മദ്​ അൽ ദഹീരി, ഉമ്മുൽ ഖുവൈൻ കോർട്ടിലെ ഇബ്രാഹിം ഉബൈദ്​ അലി അൽ അലി, അബ്​ദുല്ല മുഹമ്മദ്​ അഹ്​മദ്​ അൽ അൻസാരി, അഹ്​മദ്​ മുഹമ്മദ്​ അഹ്​മദ്​ യൂസുഫ്​ അൽ ഷെഹി തുടങ്ങിയവരാണ്​ കൗൺസിലിൽ അംഗങ്ങളായുള്ളത്​.