സുഡാനി യുവാവി​െൻറ കുടുംബ സമാഗമത്തിന്​  യത്​നിച്ച സഹൃദയന്​ തൊഴിൽ നഷ്​ടപ്പെട്ടു

ദുബൈ: പതിനാറു വർഷമായി എവിടെയെന്നറിയാതെ ഹൃദയവേദനയോടെ കഴിഞ്ഞുപോന്ന കോഴിക്കോടുകാരിയായ ഉമ്മയും സുഡാൻകാരനായ മകനും ഒരുമിച്ചു ചേരുന്ന അതിമനോഹരമായ നിമിഷങ്ങൾക്ക്​ യു.എ.ഇയുടെ മണ്ണ്​ കഴിഞ്ഞയാഴ്​ച സാക്ഷ്യം വഹിച്ചുവല്ലോ. കൈവിട്ടു പോയ ഉമ്മയെയും ​സഹോദരങ്ങളെയും കാണാനുള്ള ആഗ്രഹം കാരണം സുഡാനിൽ നിന്ന്​ ദുബൈയിലെത്തിയ ഹനിയുടെ കഥ ‘ഗൾഫ്​ മാധ്യമ’ത്തിലൂടെയാണ്​ പുറം ലോകമറിഞ്ഞത്​. വായനാ ലോകവും ഇംഗ്ലീഷ്​ പത്രങ്ങളും ചാനലുകളുമുൾപ്പെടെ മാധ്യമങ്ങളും ഇൗ വാർത്തയെ പിൻതുടർന്നതോടെ ഹനിക്ക്​ യു.എ.ഇയിൽ ജോലി ലഭിച്ചു. പാക്​ സ്വദേശി ത്വൽഹാ ഷാ ടിക്കറ്റ്​ നൽകി ഉമ്മയെ ഇവിടെയെത്തിക്കുകയും ചെയ്​തു. 

കരഞ്ഞ്​ പ്രാർഥിച്ച്​ കൈവന്ന ഇൗ അവസരത്തിലെ നിമിഷങ്ങൾ പാഴാക്കാതെ കഴിയുന്നത്ര ഒരുമിച്ചു നിൽക്കുന്നുണ്ട്​ ആ ഉമ്മയും മകനും ഇവിടെ. 
ഏതൊരു നല്ലകാര്യം സാധ്യമാക്കുന്നതിനും ബുദ്ധിമുട്ടും ത്യാഗവും സഹിക്കണമല്ലോ. ഇൗ പുനസമാഗമം സാധ്യമാക്കുന്നതിന്​ മുഖ്യ പങ്കു വഹിച്ച മണ്ണാർക്കാട്​ സ്വദേശി ഫാറൂഖാണ്​ ഇക്കുറി ത്യാഗം സഹിക്കേണ്ടി വന്നത്​. ഹനി ഉമ്മയോടും സഹോദരങ്ങൾക്കുമൊപ്പം ചേർന്ന വിവരം സുഡാനിലുള്ള പിതാവും അറിഞ്ഞതോടെ അവിടെ ലഭിച്ച ജോലി ഉപേക്ഷിക്കേണ്ടി വന്നിരിക്കയാണ്​ ഫാറൂഖിനിപ്പോൾ.  

18 വർഷം സൗദിയിൽ ഒഫീസ്​ അസിസ്​റ്റൻറായി ജോലി ചെയ്​തിരുന്ന  ഫാറൂഖ്​ അതൊഴിവാക്കിയാണ്​ സന്ദർശക വിസയിൽ​ സുഡാനിലെ ബഹ്​റൈൻ ഖാർത്തൂമിലെത്തി ജോലി ആരംഭിച്ചത്​. അവിടെ വെച്ചാണ്​ യാദൃശ്​ചികമായി ഹനിയെ കണ്ടു മുട്ടിയതും കഥകളെല്ലാം അറിയുന്നതും. ഉമ്മയേയും സഹോദരങ്ങളെയും കാണണം എന്ന്​ ചെറിയ കുഞ്ഞായിരിക്കു​േമ്പാൾ മുതൽ ആവശ്യപ്പെട്ടിട്ടും തടഞ്ഞുവെച്ച പിതാവ്​ അറിയാതെ ഹനിയുടെ വിവരങ്ങളും രേഖകളുമെല്ലാം ബന്ധുക്കൾക്കും ‘ഗൾഫ്​ മാധ്യമ’ത്തിനും നൽകിയത്​ ഫാറൂഖ്​ ആയിരുന്നു. ഹനി ഉമ്മയും സഹോദരങ്ങളുമായി സംഗമിച്ച വിവരവും അതിൽ ഫാറൂഖ്​ വഹിച്ച പങ്കും സുഡാനിൽ വലിയ സ്വാധീനമുള്ള ഹനിയുടെ പിതാവ്​ ഇക്കാര്യം അറിഞ്ഞ സ്​ഥിതിക്ക്​ മലയാളികൾ പേരിനുപോലുമില്ലാത്ത ഖാർത്തൂമിൽ  ജോലിക്ക്​ പോകുന്നത്​ ഒഴിവാക്കാനാണ്​ സുഹൃത്തുക്കളും ബന്ധുക്കളും ഉപദേശിക്കുന്നത്​. അങ്ങിനെ നാട്ടിലേക്ക്​ മടങ്ങി. 

ഇതോടെ ജീവിത മാർഗവും വിഷമാവസ്​ഥയിലായിരിക്കുകയാണ്​. സുഹൃത്തുക്കൾ വഴി യു.എ.ഇയിൽ ചെറുതായി തൊഴിലന്വേഷണം നടത്തിയെങ്കിലും ഫലം കണ്ടിട്ടില്ല.  കാണാൻ കാത്തിരുന്ന ഒരു കുടുംബത്തെ കൂട്ടിയിണക്കുക എന്ന മഹത്തായ സത്​കർമം നിർവഹിച്ചതിനിടെയിൽ സംഭവിച്ച നഷ്​ടത്തിൽ വിഷമമേതുമില്ലെന്നും അതിനേക്കാൾ നല്ലത്​ തനിക്കായി ദൈവം കാത്തുവെച്ചിട്ടുണ്ടാവുമെന്നുമാണ്​ ഫാറൂഖ്​ പറയുന്നത്​.