ഫാൻസി നമ്പർ പ്ലേറ്റുകളുടെ ലേലത്തുക ഷാർജ പൊലീസ്​ സംഭാവന ചെയ്യും 

ഷാർജ: ഏറ്റവും ഡിമാൻറുള്ള മൂന്ന്​ നമ്പർ പ്ലേറ്റുകൾ ലേലം ചെയ്​ത്​ ലഭിക്കുന്ന തുക ഷാർജ പൊലീസ്​ ജീവകാരുണ്യ സംഘമായ ദി ബിഗ്​ ഹാർട്ട്​ ഫൗണ്ടേഷന്​ സംഭാവന ചെയ്യും.ഇൗ മാസം 21ന്​ എമിറേറ്റ്​സ്​ ഒാക്​ഷനുമായി സഹകരിച്ച്​ ലേലം ചെയ്യുന്ന 55 നമ്പർ പ്ലേറ്റുകളിൽ 111,303,3333 എന്നിവയുടെ തുകയാണ്​ ഫൗണ്ടേഷന്​ നൽകുക.  ഷാർജ മീഡിയാ കൗൺസിൽ ചെയർമാനും ഫൗണ്ടേഷൻ അംബാസഡറുമായ ശൈഖ്​ സുൽത്താൻ ബിൻ അഹ്​മദ്​ അൽ ഖാസിമി, ഷാർജ പൊലീസ്​ കമാൻഡർ ഇൻ ചീഫ്​ മേജർ ജനറൽ സൈഫ്​ അൽ സാരി അശ്ശംസി, എമിറേറ്റ്​സ്​ ഒാക്​ഷൻ ചെയർമാൻ അബ്​ദുല്ല മത്താർ അൽ മന്നാഇ, ബിഗ്​ ഹാർട്ട്​ ഫൗണ്ടേഷൻ ഡയറക്​ടർ മറിയം അൽ ഹമ്മാദി എന്നിവരുടെ സാന്നിധ്യത്തിൽ  ഷാർജ പൊലീസ്​ ആസ്​ഥാനത്ത്​ നടന്ന വാർത്താ സമ്മേളനത്തിലാണ്​ ഇതു സംബന്ധിച്ച പ്രഖ്യാപനമുണ്ടായത്​. നേരത്തേ ഷാർജ പൊലീസും ഫൗണ്ടേഷനും പരസ്​പര സഹകരണത്തിന്​ ധാരണാപത്രം ഒപ്പുവെച്ചിരുന്നു. 
3, 13, 30, 44,  115, 131, 210, 311, 456, 500, 609, 696, 990 തുടങ്ങിയ നമ്പറുകൾ ലേലത്തിനുണ്ടാവും. 

ലോകമെമ്പാടുമുള്ള ക​ുഞ്ഞുങ്ങൾക്കും കുടുംബങ്ങൾക്കും സുരക്ഷിതമായ അന്തരീക്ഷം ഒരുക്കാൻ ഫൗണ്ടേഷൻ നടത്തുന്ന പ്രവർത്തനങ്ങൾക്ക്​ ഷാർജ പൊലീസ്​ നൽകിയ മഹത്തായ പിന്തുണയാണ്​ ഇൗ ഉദ്യമമെന്ന്​ ശൈഖ്​ സുൽത്താൻ ബിൻ അഹ്​മദ്​ അൽ ഖാസിമി പറഞ്ഞു. നൻമയും സ്​നേഹവും ലോകമെമ്പാടും പരത്താനുള്ള ഷാർജയുടെ ദൗത്യത്തിന്​ വലിയ സംഭാവനകളർപ്പിക്കാൻ ഷാർജ പൊലീസ്​ പ്രതിജ്​ഞാബദ്ധമാണെന്ന്​ മേജർ ജനറൽ സൈഫ്​ അൽ സാരി അശ്ശംസി വ്യക്​തമാക്കി. ശൈഖ ജവാഹർ ബിൻത്​ മുഹമ്മദ്​ അൽ ഖാസിമി തുടക്കമിട്ട ഫൗണ്ടേഷൻ ഫലസ്​തീൻ, ഇറാഖ്​, ലബനൻ,ജോർദാൻ എന്നിവിടങ്ങളിലും റോഹിംഗ്യൻ അഭയാർഥി ക്യാമ്പുകളിലും മറ്റുമായി പതിയായിരക്കണക്കിന്​ കുടുംബങ്ങൾക്ക്​  അഭയമൊരുക്കുന്നുണ്ട്​.