സൂക്ഷിച്ചു വേണം കമൻറും ലൈക്കും

ദുബൈ: സാമൂഹിക മാധ്യമങ്ങൾ വന്നതോടെയാണ്​ നമ്മുടെ നാടിത്ര വർഗീയവത്​കരിക്കപ്പെട്ടത്​ എന്ന്​ പറയാറില്ലേ. ഒരേ ബെഞ്ചിലിരുന്ന്​ പഠിച്ചവരും ഒരേ കടയിൽ ഇരുന്ന്​ കഴിച്ചവരും സാമൂഹിക മാധ്യമങ്ങളിലിരുന്ന്​ ആജൻമ ശത്രുക്കളെപ്പോലെ വർഗീയ തർക്കം നടത്തുന്നത്​ പതിവായി മാറിയിരിക്കുന്നു. നാട്​ വിട്ട്​ പ്രവാസം ആരംഭിച്ചാൽ പിന്നെ വർഗീയ കമൻറുകളുടെ എരിവും മൂർച്ചയും വർധിക്കുകയാണ്​ രീതി. ഒാൺലൈനിലൂടെ മോശം പരാമർശങ്ങൾ നടത്തുന്നവർക്ക്​ കർശന ശിക്ഷയുള്ള യു.എ.ഇയിൽ ഇൗ അടുത്ത കാലത്തു മാത്രം വി​ദ്വേഷ കമൻറുകളുടെ പേരിൽ മൂന്ന്​ മലയാളി യുവാക്കളാണ്​ നിയമനടപടി നേരിട്ടത്​.

വ്യാജ ​െഎ.ഡികൾ ഉപയോഗിച്ച്​ വർഗീയ വിഷം ഒഴുക്കുന്ന നിരവധി മലയാളികളും ഇവിടെയുണ്ടെന്നാണ്​ വിവരം. വിഷയം പൊലീസിലറിയിച്ചാലുണ്ടാവുന്ന പ്രത്യാഘാതത്തെക്കുറിച്ച്​ ബോധ്യമുള്ളതിനാൽ മോശം കമൻറിടുന്നവരെ ബ്ലോക്ക്​ ചെയ്​തും നാട്ടുകാരല്ലേ എന്നോർത്ത്​ ക്ഷമിച്ചും വിഷയം അവസാനിപ്പിക്കാറായിരുന്നു പതിവ്​. എന്നാൽ മോശം കമൻറിട്ട്​ പിന്നെയും വെല്ലുവിളി നടത്തുന്നതു കാണു​േമ്പാൾ ഒരു പാഠം പഠിപ്പിച്ചിട്ടു തന്നെ കാര്യം എന്ന്​  തീരുമാനിച്ച്​ ആളുകൾ പരാതി നൽകുന്നതോടെയാണ്​ നിയമ നടപടികൾ ആരംഭിക്കുന്നത്​. സാമൂഹിക മാധ്യമങ്ങളിലെ പ്രവർത്തനങ്ങൾ യു.എ.ഇയിലെ കുറ്റാന്വേഷണ വിഭാഗവും നിരീക്ഷിക്കുന്നുണ്ട്​.

സമൂഹത്തിൽ കുഴപ്പം സൃഷ്​ടിക്കുന്നതും സ്​ത്രീകളെ അവഹേളിക്കുന്നതും മറ്റുമായ പോസ്​റ്റുകളിട്ടാൽ ഉടനടി നടപടികളും ആരംഭിക്കും. തന്നെ അവഹേളിച്ച്​ പോസ്​റ്റുകളിട്ട ഹരിപ്പാട്​ സ്വദേശിക്കെതിരെ മണിക്കൂറുകൾ​ക്കകം നടപടി സ്വീകരിച്ച യു.എ.ഇയുടെ നടപടിയെയും നിയമങ്ങളെയും പ്രകീർത്തിച്ച്​ ഇന്ത്യൻ മാധ്യമ പ്രവർത്തക റാണാ അയ്യൂബ്​ രംഗത്തു വന്നിരുന്നു. ഒാൺലൈൻ മുഖേന ഭീകരവാദ സംഘടനകളിലേക്ക്​  ആകർഷിക്കാൻ ശ്രമിക്കുന്നവർക്ക്​ ദീർഘകാലം നീണ്ടു നിൽക്കുന്ന കഠിന തടവാണ്​ ലഭിക്കുക.