ഫേസ്​ബുക്ക്​ പ്രേമികൾ ജാഗ്രതൈ; സ്വകാര്യ ചിത്രങ്ങൾ കൈവശപ്പെടുത്തി ഭീഷണിപ്പെടുത്തുന്ന സംഭവം പെരുകുന്നുവെന്ന്​​ പൊലീസ്​

ദുബൈ: അപരിചിതരായവരുടെ സൗഹൃദാഭ്യർത്ഥനകൾ സ്വീകരിക്കുന്നതിൽ സൂക്ഷമത പുലർത്തണമെന്ന്​ പൊലീസ്​. ഫോണിലോ സാമൂഹിക മാധ്യമങ്ങളുടെ അകൗണ്ടുകളിലോ സൂക്ഷിക്കുന്ന സ്വകാര്യ ചിത്രങ്ങളും മറ്റും ചോർത്തി ബ്ലാക്​മെയിൽ ചെയ്യുന്ന സംഭവങ്ങൾ പെരുകുന്ന പശ്ചാത്തലത്തിലാണ്​ മുന്നറിയിപ്പ്​​. ഇൗ വർഷം ഇത്തരത്തിലുള്ള 80 കേസുകൾ അന്വേഷിച്ചിട്ടുണ്ട്​. ജനുവരി മുതൽ ഒക്​ടോബർ വരെ 83 കേസുകൾ ഉണ്ടായി. 2016 ൽ 87 ഉം 2015 ൽ 80 ഉം 2014 ൽ 66 കേസുകളും ഉണ്ടായി. ഇത്തരം സംഭവങ്ങളിൽ ഇരകളാക്കപ്പെടുന്നത്​ 26 നും 36 നും ഇടക്ക്​ പ്രായമുള്ളവരാണ്​. ഇൗ സാഹചര്യത്തിൽ കുട്ടികൾക്കും മുതിർന്നവർക്കുമിടയിൽ ബോധവൽക്കരണ പ്രചാരണം നടത്തുകയാണ്​ പൊലീസ്​. ടെലികമ്മ്യൂണിക്കേഷൻ റെഗുലേറ്ററി അതോറിറ്റിയും ക്ലാസുകളും ചെറിയ വീഡിയോകളുമായി രംഗത്തുണ്ട്​. അപരിചിതരുടെ സൗഹൃദ വലയത്തിലായ കൗമാരക്കാരും തട്ടിപ്പിൽ പെട്ടിട്ടുണ്ടെന്ന്​ സി.​െഎ.ഡി. ഡെപ്യുട്ടി ഡയറക്​ടർ ലഫ്​റ്റനൻറ്​ കേണൽ മുഹമ്മദ്​ അഖീൽ പറഞ്ഞു. സൈബർ കുറ്റകൃത്യങ്ങളിലേർപ്പെട്ട 20000 വെബ്​സൈറ്റുകളാണ്​ കഴിഞ്ഞ രണ്ട്​ വർഷത്തിനിടെ അധികൃതർ പൂട്ടിച്ചത്​.
ഭീഷണിപ്പെടുത്തി പണം തട്ടാന ആഗ്രഹിക്കുന്നവർ കുടുതലും പുരുഷൻമാരെയാണ്​ ഉന്നം വെക്കുന്നതെന്ന്​ സൈബർ ​ക്രൈം ഡിവിഷനിലെ മേജർ സൗദ്​ മുഹമ്മദ്​ അല ഖാലിദി പറഞ്ഞു. യു.എ.ഇയിലെ സർവകലാശാല അധ്യാപികയുടെ ഫേസ്​ബുക്കിൽ നിന്ന്​ ചിത്രം മോഷ്​ടിച്ച്​ മന്ത്രവാദം പ്രോൽസാഹിപ്പിക്കുന്ന ഫേസ്​ബുക്ക്​പേജ്​ തുടങ്ങിയെന്ന പരാതിയും പൊലീസിന്​ കിട്ടിയിരുന്നു.  ഇൻറർനെറ്റിലൂടെ ആരെങ്കിലും ഭീഷണിപ്പെടുത്തിയാൽ പണം നൽകരുതെന്നും ഉടൻ പൊലീസിൽ അറിയിക്കണമെന്നും അധികൃതർ അറിയിച്ചു. യു.എ.ഇയിലെ നിയമം അനുസരിച്ച്​ 10 വർഷം തടവ്​ കിട്ടാവുന്ന കുറ്റമാണിത്​.