ആഭ്യന്തര ടൂറിസം പ്രോത്സാഹിപ്പിക്കാൻ എമിറേറ്റ്‌സ് ടൂറിസം കൗൺസിൽ

അബൂദബി: യു.എ.ഇയിൽ ആഭ്യന്തര ടൂറിസം പ്രോത്സാഹിപ്പിക്കുന്നതിന് പുതിയ ശ്രമങ്ങളുമായി എമിറേറ്റ്‌സ് ടൂറിസം കൗൺസിൽ. സാമ്പത്തിക മന്ത്രാലയത്തി​െൻറയും പ്രാദേശിക ടൂറിസം വകുപ്പുകളുടെയും സംയുക്ത പ്രവർത്തന പദ്ധതിക്ക് ഓൺലൈനിൽ ചേർന്ന കൗൺസിൽ അംഗീകാരം നൽകി. അന്താരാഷ്​ട്ര വിനോദ സഞ്ചാരികളുടെ വരവ് യു.എ.ഇയിലേക്ക് വർധിപ്പിക്കാനും പുതിയ ടൂറിസം മാർക്കറ്റുകൾ തുറക്കുന്നതിനും സംയുക്ത സംരംഭം ലക്ഷ്യമിടുന്നു. യു.എ.ഇ സന്ദർശിക്കാൻ വിനോദസഞ്ചാരികളെ പ്രേരിപ്പിക്കുന്ന ഒട്ടേറെ ടൂറിസം പ്രോത്സാഹന കാമ്പയി​നുകൾ നടപ്പാക്കും. ഇതിനായി ദീർഘകാല മൾട്ടിപ്പ്​ൾ എൻട്രി ടൂറിസ്​റ്റ്​ വിസ അവതരിപ്പിക്കും.ടൂറിസം മേഖലയിൽ മികച്ച പ്രകടനം കൈവരിക്കാനും കോവിഡ് പ്രതിസന്ധിയുടെ ആഘാതത്തിൽനിന്ന് വീണ്ടെടുക്കാനുമുള്ള നടപടികൾ കൈക്കൊള്ളും. ടൂറിസം മേഖലയിൽ വളർച്ചയുടെയും വികസനത്തി​െൻറയും പുതിയ ഘട്ടത്തിലേക്ക് നീങ്ങാൻ കഴിയുന്നതോടെ ദേശീയ സമ്പദ്​വ്യവസ്ഥയെ പിന്തുണക്കുന്നതിൽ ടൂറിസം മികച്ച സംഭാവന നൽകുമെന്ന് യു.എ.ഇ സംരംഭകത്വ സഹമന്ത്രി ഡോ. അഹ്​മദ് ബെൽഹൗൽ അൽ ഫലാസി ചൂണ്ടിക്കാട്ടി.

എല്ലാ എമിറേറ്റുകളിലെയും ടൂറിസം മേഖലക്ക് പ്രയോജനം ലഭിക്കുന്ന പുതിയ സംയോജിത സംരംഭങ്ങളും പരിഹാരങ്ങളും വികസിപ്പിക്കുന്നതിന് ഫെഡറൽ-പ്രാദേശിക തലങ്ങളിൽ ഏകോപന സംവിധാനവും കൗൺസിൽ ആവിഷ്‌കരിച്ചു. ശൈത്യകാലത്തെ ആഭ്യന്തര ടൂറിസം പ്രചാരണ നടപടികളും എമിറേറ്റ്‌സ് ടൂറിസം കൗൺസിൽ അംഗീകരിച്ചു. രാജ്യത്തെ ടൂറിസം ഡാറ്റ ശേഖരണത്തെ പിന്തുണക്കുന്നതിനുള്ള നടപടിക്രമങ്ങൾ അംഗീകരിക്കുകയും ചെയ്​തു. ഫെഡറൽ അതോറിറ്റി ഫോർ ഐഡൻറിറ്റി ആൻഡ് സിറ്റിസൺഷിപ് അഞ്ച് വർഷത്തെ മൾട്ടി-എൻട്രി ടൂറിസ്​റ്റ്​ വിസ നൽകുന്നത് സംബന്ധിച്ചെടുത്ത തീരുമാനവും കൗൺസിൽ ചർച്ച ചെയ്​തു. യു.എ.ഇയിലെ ടൂറിസത്തി​െൻറ ഭാവി രൂപപ്പെടുത്തുന്നതിനുള്ള പ്രധാന നീക്കമാണിത്. വെബ്സൈറ്റ് വഴി രാജ്യത്തിനകത്തുനിന്നും പുറത്തുനിന്നുമുള്ള വിവിധ വിഭാഗങ്ങളിലെ സന്ദർശകർക്ക് നടപടിക്രമങ്ങൾ സുഗമമാക്കുന്നതിനും വേഗത്തിലാക്കുന്നതിനും ഈ സംരംഭം പിന്തുണക്കുമെന്നും കൗൺസിൽ വിലയിരുത്തി.