ഹത്ത എമിഗ്രേഷന്‍ ഓഫീസ് പ്രവർത്തനം വൈകീട്ട്​ നാലുവരെ  

ദുബൈ :  ദുബൈ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്​സി​​​െൻറ (ദുബൈ എമിഗ്രേഷൻ)  ഹത്തയിലെ കസ്​റ്റമർ ഹാപ്പിനസ് സ​​െൻറര്‍ ഏപ്രിൽ ഒന്ന്  മുതൽ വൈകുന്നേരം 4 മണിവരെ പ്രവർത്തിക്കുമെന്ന് അധിക്യതർ അറിയിച്ചു.  ഞായറാഴ്ച മുതൽ  രാവിലെ 7.30 മുതൽ   4 മണിവരെ ഇവിടെ നിന്ന് ഉപഭോക്തസേവനങ്ങൾ ലഭിക്കും.നിലവില്‍ ഉച്ചക്ക് 2.30 വരെയായിരുന്നു   പ്രവർത്തനം. പൊതുജനങ്ങൾക്ക് മികച്ച  ഉപഭോക്തസേവനങ്ങൾ ലഭ്യമാക്കുന്നതിനാണ് നിലവിലെ പ്രവർത്തി സമയം ദീർഘിപ്പിച്ചതെന്ന് ജി.ഡി.ആർ.എഫ്.എ ദുബൈ  ഡയറക്ടർ ജനറൽ മേജർ ജനറൽ മുഹമ്മദ് അഹമ്മദ് റാഷിദ് അൽ മറി അറിയിച്ചു. 

അന്താരാഷ്​ട്ര നിലവാരമുള്ള ഉപഭോക്​തൃ സേവനങ്ങൾ ഉറപ്പാക്കുന്നത്​ കണക്കിലെടുത്ത്​ ഈ വര്‍ഷം ജനുവരിയില്‍  ദുബൈ കീരിടാവകാശിയും ദുബൈ എക്സിക്യൂട്ടീവ് കൗൺസിൽ ചെയർമാനുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തും ഈ ഓഫീസിന് പഞ്ചനക്ഷത്രപദവി സമ്മാനിച്ചിരുന്നു. 
2017-ല്‍ ഹത്ത അതിർത്തി വഴി യാത്ര ചെയ്തത് 2476662 യാത്രക്കാരാണ്. നിയമപരമായ യാത്ര രേഖകളുള്ള ഒരാൾക്ക് ഇവിടെ നിന്ന് എമിഗ്രേഷൻ നടപടി പൂർത്തിയാക്കാൻ വെറും 20 സെക്കൻറ്​ മതി.