വൈദ്യുതി ഉപയോഗം കുറക്കാൻ ഷാർജയിലെ പള്ളികളിൽ സ്​മാർട്ട്​ എ.സി

ഷാര്‍ജ: ഷാർജയിലെ പള്ളികളിൽ പള്ളികളിൽ അന്തരീക്ഷ ഉൗഷ്​മാവനുസരിച്ച്​ ചൂടും തണുപ്പും സ്വയം ക്രമീകരിക്കുന്ന സ്​മാർട്ട്​ എയർ കണ്ടീഷനറുകൾ. ഷാര്‍ജ- വൈദ്യുതി ജല വിഭാഗം (സേവ) അഞ്ച് പള്ളികളിലായി 88 സ്മാര്‍ട്ട് എയര്‍കണ്ടീഷനറുകളാണ്​ വെച്ചത്​.  സ്വയം നിയന്ത്രണം യന്ത്രം സ്ഥാപിച്ചതിലൂടെ 30 ശതമാനം വൈദ്യുതി ഉപയോഗം കുറക്കാനാകുമെന്നാണ് സേവ കണക്ക് കൂട്ടുന്നത്.

ജല-വൈദ്യുതി ഉപയോഗം പരമാവധി കുറക്കാന്‍ പള്ളിയില്‍ എത്തുന്നവര്‍ ശ്രദ്ധിക്കണമെന്നും സേവ ഉണര്‍ത്തുന്നു. ആരാധനാലയങ്ങളില്‍ ബോധവത്കരണ ലഘുലേഖകള്‍ വിതരണം ചെയ്യാനും ഇതുമായി ബന്ധപ്പെട്ട പ്രഭാഷണങ്ങള്‍ നടത്താനും ഇസ്​ലാമിക് അഫയേഴ്സ് ഡിപ്പാര്‍ട്ടുമ​െൻറുമായി ചേർന്ന്​ സമഗ്ര പരിപാടി  തയ്യാറാക്കിയതായി സേവ ചെയര്‍മാന്‍ ഡോ. റാഷീദ് ആല്‍ ലീം പറഞ്ഞു .

സാധാരണ ബള്‍ബുകള്‍ മാറ്റി എല്‍.ഇ.ഡി ബള്‍ബുകള്‍ സ്ഥാപിക്കുമെന്നും നമസ്കാര ശേഷം എയര്‍കണ്ടീഷനറുകളുടെ പ്രവര്‍ത്തനം നിറുത്താന്‍ ശ്രദ്ധിക്കണമെന്നും അദ്ദേഹം ഓര്‍മിപ്പിച്ചു. തുടക്കത്തില്‍ ഒരു പള്ളിയില്‍  തെര്‍മോസ്റ്റാട്ടുകള്‍ സ്ഥാപിച്ചു നടത്തിയ സമഗ്ര പഠനത്തില്‍ ഇത് വൈദ്യുതി ഉപയോഗം 26 ശതമാനം കുറഞ്ഞതായി കണ്ടണ്ടെത്തിയിരുന്നു. തുടർന്നാണ്​  മറ്റിടങ്ങളിലേക്ക് ഇത് വ്യാപിപ്പിച്ചതെന്ന് സേവ എഞ്ചിനീയര്‍ ഘാദ സെയ്ം പറഞ്ഞു.