ഇലക്ട്രിക്  കാറുകള്‍ക്ക് സൗജന്യ ചാര്‍ജിങ്​ സൗകര്യമൊരുക്കി ‘ഫെവ’

അജ്മാന്‍ : പരിസ്ഥിതി സൗഹൃദ വാഹനങ്ങള്‍ക്ക് വേണ്ടി  പുതുതായി നിലവില്‍ വന്ന ഇലക്ട്രിക്ക് ചാര്‍ജിങ്​ സ്​റ്റേഷനുകളിൽ ഉപഭോക്താക്കള്‍ക്ക്  സൗജന്യ സേവനമൊരുക്കി  ഫെഡറൽ വൈദ്യുതി,ജല അതോറിറ്റി(ഫെവ). രണ്ടു മാസത്തേക്കാണ് ഫെവ ഈ സൗജന്യ സംവിധാനം ഒരുക്കിയിട്ടുള്ളത്. വടക്കന്‍ എമിറേറ്റുകളിലെ  ഫെവ ഓഫീസുകളില്‍ 11 എണ്ണവും പൊതുനിരത്തുകളില്‍ 50 എണ്ണവുമടക്കം മൊത്തം 61 പുതിയ സ്​റ്റേഷനുകളാണ് കഴിഞ്ഞ ദിവസം പുതുതായി ആരംഭിച്ചത്.

ഊര്‍ജ്ജ കാര്യക്ഷമത വര്‍ധിപ്പിക്കാനും  വാഹനങ്ങള്‍ പുറം തള്ളുന്ന കാര്‍ബണി​​െൻറ അളവ് കുറക്കുന്നതിനും ഇത്തരം ചാര്‍ജിങ്​ സ്​റ്റേഷനുകളൾ  സഹായകമായിരിക്കുമെന്ന് ഫെവ ആക്ടിങ്​ ഡയറക്​ടർ  അദ്നാന്‍ നസീബ് സാലം പറഞ്ഞു.  ഗ്രീൻ പാർകിംഗ് എന്ന  കമ്പനിയുമായി സഹകരിച്ചാണ് സ്​റ്റേഷനുകള്‍ സ്ഥാപിച്ചിരിക്കുന്നത്.  പ്രധാനപ്പെട്ട മാളുകൾ, ആശുപത്രികൾ, ഹോട്ടലുകൾ, സർക്കാർ വകുപ്പുകൾ, ഏതാനും സ്വകാര്യ കമ്പനിൾ എന്നിവിടങ്ങളിലും ഇവ സ്ഥാപിക്കും. അതിവേഗ  ചാർജിങ്​ സ്റ്റേഷനുകൾ ഹൈവേകളിലും പെട്രോൾ സ്റ്റേഷനുകളിലും രാജ്യത്തുടനീളം സ്ഥാപിക്കും. 

ഇടത്തരം സ്​റ്റേഷനുകളിൽ സാധാരണ ചാർജ് ചെയ്യാന്‍ ഒന്നര മണിക്കൂര്‍ എടുക്കുമ്പോള്‍ അതിവേഗ സ്​റ്റേഷനുകളില്‍ കാര്‍  പൂർണമായും ചാർജ് ചെയ്യാൻ 15 മിനിറ്റ് മാത്രം മതി. അതേസമയം കാര്‍ വീടുകളില്‍ ചാര്‍ജ് ചെയ്യാന്‍ 12 മണിക്കൂറെടുക്കും. കാര്‍ ബാറ്ററി മുഴുവനായി ചാര്‍ജ് ചെയ്‌താല്‍ 250 കിലോമീറ്റര്‍ യാത്ര ചെയ്യാനാകും. ഇതിനു ഒമ്പത്​ ദിർഹമാണ്​ ​ചെലവ് വരിക. എല്ലാ ​െവ ഓഫീസുകളിലും ഇടത്തരം ചാർജിംഗ് സ്റ്റേഷനുകൾ സ്ഥാപിക്കാനും  പരിപാടിയുണ്ട്.
ഫെവ ഉപഭോക്താക്കൾക്ക് പിന്നീട് അവരുടെ  അക്കൗണ്ടുകളിലൂടെയോ അല്ലാത്തവര്‍ക്ക് മറ്റു  അക്കൗണ്ടുകളിലൂടെ പണമടയ്ക്കാം.  പ്രീ-പെയ്ഡ് റീചാർജബിൾ കാർഡുകൾ വഴി പണമടക്കാനുള്ള സൗകര്യവും ഒരുക്കുന്നുണ്ട്‌.