ഈദ്ഗാഹുകളിൽ പെരുന്നാൾ സന്തോഷം നിറഞ്ഞൊഴുകി

ഷാർജ: കറുത്തവനും വെളുത്തവനും അറബിയും അനറബിയും തമ്മിൽ യാതൊരു വിധ വേർതിരിവുമില്ല എന്ന ആഹ്വാനത്തോടെയാണ് പെരു ന്നാൾ നമസ്​ക്കാര ശേഷം യു.എ.ഇയിലെ പള്ളികളിൽ നിന്ന് പ്രസംഗങ്ങൾ മനുഷ്യ സമൂഹത്തിലേക്ക് ഒഴുകിയത്. പരസ്​പരം കെട്ടി പുണർന്നും തങ്ങളിൽ കഷ്​ടത അനുഭവിക്കുന്നവരെ സഹായിച്ചുമാണ് പെരുന്നാൾ സന്തോഷവുമായി വിശ്വാസികൾ വീടുകളിലേക്ക് പിരിഞ്ഞ് പോയത്. ബാച്ച്​ലർ മുറികളിലാകെ ബഹുസ്വര സ്​നേഹത്തി​​െൻറ പെരുന്നാൾ വെളിച്ചമായിരുന്നു. നമസ്​ക്കാരത്തിന് പോയ സഹമുറിയൻമാർക്കായി പ്രഭാത ഭക്ഷണവും പായസവും ഒരുക്കി കാത്തിരിക്കുന്ന സഹോദരങ്ങൾ വെറുപ്പിന്​ നമ്മെ കീഴ്​പ്പെടുത്താനാവില്ല എന്ന പ്രത്യാശക്ക്​ അടിവരയിട്ടു.

പെരുന്നാൾ നമസ്​ക്കാരം കഴിഞ്ഞതോടെ കാലിയായ തെരുവുകൾക്ക് വൈകീ​േട്ടാടെ വീണ്ടും അനക്കം വെച്ചു. വടക്കൻ എമിറേറ്റുകളിലേക്കുള്ള റോഡുകളിലാണ് ഏറ്റവും കൂടുതൽ യാത്രക്കാരെ കണ്ടത്. ഷാർജയുടെ അഭിമാനമായ ഷാർജ പള്ളിയും ഖോർഫക്കാൻ തുരങ്ക പാതയും സന്ദർശിക്കുവാൻ ആയിരങ്ങളാണ് ഒന്നാം പെരുന്നാളിന് എത്തിയത്. മലമടക്കുകൾക്കുള്ളിൽ സ്​ഥിതി ചെയ്യുന്ന ഷാർജയുടെ ഗ്രാമങ്ങളായ വാദി ഷീസ്​, ഖദറ, റുഫൈസ അണക്കെട്ട് എന്നിവിടങ്ങളിലും സഞ്ചാരികൾ നിറഞ്ഞിരുന്നു. സന്ദർശകരുടെ ഒഴുക്ക് ഈ ഭാഗത്തേക്ക് ഉണ്ടാകുമെന്ന മുൻകൂട്ടി കണ്ട് പൊലീസും നഗരസഭകളും വൻ സുരക്ഷ ഒരുക്കങ്ങളാണ് നടത്തിയിരുന്നത്. ഖോർഫക്കാൻ, കൽബ തീര മേഖലകളിലും സന്ദർശകർ ഒഴുകിയെത്തി.