പെരുന്നാൾ നമസ്​കാരം 15 മിനിറ്റ്​​

ദുബൈ: ഈദുൽ അദ്​ഹ ആഘോഷങ്ങളുമായി ബന്ധപ്പെട്ട്​ പാലിക്കേണ്ട മാനദണ്ഡങ്ങൾ ദേശീയ ദുരന്തനിവാരണ സമിതി പുറത്തിറക്കി. പള്ളികളിലും ഈദ്​ മുസല്ലകളിലും രാജ്യത്താകമാനം പെരുന്നാൾ നമസ്​കാരങ്ങൾ നടത്താൻ അനുമതിയുണ്ടാകും. എന്നാൽ 15 മിനിറ്റ്​ നേരം മാത്രമായി ചടങ്ങുകൾ ചുരുക്കും. നമസ്​കാരത്തിന്​ 15 മിനിറ്റ്​ മുമ്പ്​ മാത്രമേ പള്ളികളും ഈദ്​ഗാഹുകളും തുറക്കാൻ പാടുള്ളൂ.

കഴിഞ്ഞാൽ ഉടൻ അടക്കണം. നമസ്​കാരത്തിനെത്തുന്നവർ മുസല്ല കൊണ്ടുവരണം. പരമ്പരാഗതമായി ​ഈദ്​ ദിനത്തിൽ ചെയ്യുന്ന ഹസ്​തദാനവും ആലിംഗനങ്ങളും പാടില്ല. ആരാധനാലയങ്ങളിൽ നമസ്​കാരത്തിന്​ മുമ്പോ ശേഷമോ ഒത്തുകൂടാൻ അനുവാദമില്ലെന്നും സമിതി വക്​താവ്​ താഹിർ അൽ അമീരി വാർത്തസമ്മേളനത്തിൽ പറഞ്ഞു.

​മഹാമാരിയുടെ സാഹചര്യത്തിൽ പ്രായമായവരും വിട്ടുമാറാത്ത രോഗങ്ങളുള്ളവരും 12 വയസ്സിൽ താഴെയുള്ള കുട്ടികളും വീട്ടിൽ ഈദ് നമസ്​കാരം നിർവഹിക്കാനും നിർദേശിച്ചിട്ടുണ്ട്​. കോവിഡ്​ ബാധിച്ചവരോ രോഗബാധിതരുമായി അടുത്ത ബന്ധമുള്ളവരോ നമസ്​കാരത്തിനെത്തുന്നത്​ കർശനമായി വിലക്കിയിട്ടുണ്ട്​.

ആഘോഷ ഭാഗമായി ബന്ധുവീടുകളിൽ പോകുന്നതും ഒത്തുചേരുന്നതും ഒഴിവാക്കണം. ആഘോഷങ്ങൾ ഒരേ വീട്ടിൽ താമസിക്കുന്ന ഒരേ കുടുംബത്തിലെ അംഗങ്ങൾ മാത്രമായി പരിമിതപ്പെടുത്താനും സമിതി നിർദേശിച്ചു​.