ബലിപെരുന്നാൾ: ദുബൈയിൽ അറവുശാലകൾ പൂർണ സജ്ജം

ദുബൈ: ബലി പെരുന്നാളിനോടനുബന്ധിച്ച്​ ഉരുക്കളെ വിതരണം ചെയ്യുന്നതുമായി ബന്ധപ്പെട്ട സേവനങ്ങൾക്കായി എമിറേറ്റിലെ അറവുശാലകൾ പൂർണ സജ്ജമായതായി ദുബൈ മുനിസിപ്പാലിറ്റി അറിയിച്ചു. ബലി മൃഗങ്ങൾക്കായുള്ള അപേക്ഷ സ്വീകരിക്കുന്നതിനും കാര്യക്ഷതയോടും ഉയർന്ന നിലവാരത്തോടും കൂടിയ സംസ്കരണ സേവനങ്ങൾ നൽകുന്നതിനുമായി അഞ്ച്​ അറവുശാലകളാണ്​ അനുവദിച്ചിരിക്കുന്നത്​. അൽ ഖിസൈസ്, അൽ ഖിസൈസ്​ എക്സ്​പ്രസ്​, അൽ ഖൂസ്​, അൽ ലിസൈലി, ഹത്ത അറവുശാലകളിലായിരിക്കും ബലി മൃഗങ്ങളുമായി ബന്ധപ്പെട്ട​ സേവനങ്ങൾ ലഭ്യമാവുക.

അഞ്ച്​ അറവുശാലകളിലായി മണിക്കൂറിൽ 1000 ബലി മൃഗങ്ങളെ വരെ സംസ്കരിക്കാനുള്ള ശേഷിയുണ്ട്​. ബലി പെരുന്നാൾ കാലയളവിലുടനീളം സുരക്ഷിതവും കാര്യക്ഷമയും ഉയർന്ന നിലവാവാരത്തിലുമുള്ള സേവനങ്ങൾ നൽകുന്നതിനായി രൂപം നൽകിയ പദ്ധതിയുടെ ഭാഗമായാണ്​ നീക്കം. ഉപഭോക്​താക്കളിൽ നിന്നുള്ള അപേക്ഷ സ്വീകരിക്കുന്നതിനുള്ള എല്ലാ നടപടിക്രമങ്ങളും അറവുശാലകളിൽ പൂർത്തിയായിക്കഴിഞ്ഞു​. പൊതുജനാരോഗ്യം, ഭക്ഷ്യ സുരക്ഷ മാനദണ്ഡങ്ങൾ അനുസരിച്ച്​ മികച്ച സേവനങ്ങൾ ഉറപ്പുനൽകുന്നതിന്​ ഏറ്റവും പുതിയ സാ​​ങ്കേതിക വിദ്യകളുടെ പിന്തുണയോടെ നൂതനമായ പ്രവർത്തന അന്തരീക്ഷമാണ്​ എല്ലാ അറവുശാലകളിലും സജ്ജമാക്കിയിട്ടുള്ളത്​. 45 വെറ്ററിനറി, മെഡിക്കൽ വിദഗ്​ധർ, 30 സൂപ്പർവൈസർമാർ, 205ലധികം വരുന്ന അറവുകാർ, 165 ജീവനക്കാർ എന്നിവർ പ്രവർത്തനങ്ങൾക്ക്​ മേൽനോട്ടം നൽകും.

മാംസത്തിന്‍റെ ഗുണമേൻമ നിലനിർത്താനും മലിനീകരണം തടയാനുമായി അറവുശാലകളിൽ നൂതനമായ അണുവിമുക്​ത സംവിധാനങ്ങളും ആധുനിക ഉപകരണങ്ങളും ഒരുക്കിയിട്ടുണ്ട്​. അറവുശാലകളിൽ നേരിട്ടുള്ള സന്ദർശനമില്ലാതെ തന്നെ ബലി മൃഗങ്ങളെ വാങ്ങാനും അറുക്കാനും വീടുകളിൽ വിതരണം ചെയ്യാനുമായി സ്മാർട്ട്​ ആപ്ലിക്കേഷൻ വഴി അപേക്ഷ സമർപ്പിക്കാം. ഈ വർഷം 20,000 ബലിമൃഗങ്ങളെയാണ്​ പ്രതീക്ഷിക്കുന്നതെന്ന്​ ദുബൈ മുനിസിലിറ്റി അധികൃതർ അറിയിച്ചു. ഇതിൽ 19500 ചെറിയ ഉരുക്കളും 500 വലിയ ഉരുക്കുകളുമാണ്​. ആകെ ഉരുക്കളിൽ 12,500 എണ്ണം വ്യക്​തികളിൽ നിന്നും 5,000 എണ്ണം സ്മാർട്ട്​ ആപ്ലിക്കേഷനുകൾ വഴിയും 2,500 എണ്ണം ജീവകാരുണ്യ സംഘടനകളിൽ നിന്നും എത്തുമെന്നാണ്​ പ്രതീക്ഷിക്കുന്നത്​. അംഗീകൃതമല്ലാ​ത്ത സൗകര്യങ്ങൾക്ക്​ പുറത്ത്​ മൃഗങ്ങളെ അറുക്കുന്നത്​ പൊതുജനാരോഗ്യത്തിന്​ ഭീഷണിയാണെന്ന്​ മുനിസിപ്പാലിറ്റി മുന്നറിയിപ്പ്​ നൽകി.