ഇവർക്ക്​ മാഞ്ചസ്​റ്ററിൽ മധുരപ്പെരുന്നാൾ

ദുബൈ:  വർണപ്പൊലിമ ഏറെയുള്ള യു.എ.ഇയിലെ പെരുന്നാൾ ആഘോഷങ്ങൾ ഇക്കുറി ഇൗ കുരുന്നുകൾക്ക്​ നഷ്​ടമാവും, പക്ഷെ അത്യന്തം ആവേശകരമായ ഒരു അതിശയപ്പെരുന്നാളാണ്​ ദുബൈ ജെംസ്​ കിൻറർ ഗാർട്ടനിലെ എട്ടു മലയാളികൾ ഉൾപ്പെടെ 12 വിദ്യാർഥികൾക്ക്​ ഇത്തവണ. ഏതൊരു ഫുട്​ബാൾ പ്രേമിയും കൊതിച്ചു​േപാകുന്ന മാഞ്ചസ്​റ്റർ സിറ്റി ക്ലബ്​ ആസ്​ഥാനമായ ഇത്തിഹാദ്​ കാമ്പസിലാണ്​ കളിച്ചും തിമിർത്തും അവരിന്ന്​ പെരുന്നാൾ ആഘോഷിക്കുന്നത്​. 
മധ്യപൂർവേഷ്യയിലെ അറുപത്​ ടീമുകൾ മാറ്റുരച്ച മാഞ്ചസ്​റ്റർ സിറ്റി അബൂദബി കപ്പ്​ ചാമ്പ്യൻഷിപ്പിൽ നേടിയ വിജയമാണ്​ ഇൗ കുട്ടികൾക്ക്​ ബ്രിട്ടീഷ്​ ക്ലബിലേക്കുള്ള വാതിൽ തുറന്നു കൊടുത്തത്​. 

ഒരാഴ്​ചത്തെ യാത്രയും താമസവും പരിശീലനവും അക്കാദമി സ്​പോൺസർ ചെയ്യുകയായിരുന്നു.  പാലക്കാട്​ സ്വദേശികളായ മുഹമ്മദ്​ ഹാത്വിം അലി ഫാറുഖ്​, ആര്യൻ ഹരിദാസ്​, തൃശുരിൽ നിന്നുള്ള സെഹൽ ഷിബു, നവനീത്​ ഷൈൻ, ​െഎദൻ നദീർ, മലപ്പുറം സ്വദേശി, മുഹമ്മദ്​ മുബീൻ, തിരുവനന്തപുരം സ്വദേശി വിനയ്​ കൃഷ്​ണൻ, ജുവൻ ജോർജ് എന്നിവരാണ്​ മലയാളി അംഗങ്ങൾ. ​വരാപ്പുഴ സ്വദേശിയായ അരുൺ പ്രതാപ്‌ ആണ്​ കുട്ടികളുടെ കോച്ച്​.  

എറണാകുളം മഹാരാജാസ്​ കോളജ്​ ടീമി​ലൂടെ ഫുട്​ബാൾ ഗ്രൗണ്ടിലിറങ്ങിയ അരുൺ പരിക്കുകൾ മൂലം തനിക്ക്​ നഷ്​ടപ്പെട്ടുപോയ ഫുട്​ബാൾ സൗഭാഗ്യങ്ങൾ വരും തലമുറയി​ലൂടെ തിരിച്ചു പിടിക്കുക എന്ന ലക്ഷ്യത്തോടെയാണ്​ കുരുന്നു പ്രതിഭകളെ പരിശീലിപ്പിക്കാനാരംഭിച്ചത്​.  അരുൺ പ്രതാപും കുട്ടികളുടെ മാതാപിതാക്കളും സംഘത്തെ അനുഗമിച്ചിട്ടുണ്ട്​. ലോകപ്രശസ്​ത ഡിഫൻഡർ  ഡാനിലോ ലൂയിസ്​ ഡിസിൽവ,സിറ്റി സ്​കൂൾ പ്രൊജക്​ട്​ മാനേജർ സിമേൺ ഹെവിറ്റ്​, സിമോൺ സാപ്പിയ, റോസ്​ ബോണ്ട്​, ​ക്രിസ്​റ്റിൻ മാനോൺ എന്നിവരാണ്​ മാഞ്ചസ്​റ്ററിൽ കുട്ടികൾക്ക്​ പരിശീലനം നൽകിയത്​.