ആറാമത്  ഐറ്റെകസ് നാളെ അജ്മാനില്‍  തുടങ്ങും 

അജ്മാന്‍ :അജ്മാന്‍ ചേംബര്‍ ഓഫ് കൊമേഴ്സി​​​െൻറ ആഭിമുഖ്യത്തില്‍   നടത്തുന്ന  ആറാമത് വിദ്യാഭ്യാസ പ്രദര്‍ശനം (ഐടെക്സ് 2017)ഇൗമാസം ആറിന് ആരംഭിക്കും . അജ്മാന്‍ ജറഫിലുള്ള  എമിറേറ്റ്സ് ഹോസ്പിറ്റാലിറ്റി സ​​െൻററില്‍ സംഘടിപ്പിക്കുന്ന പ്രദര്‍ശനത്തിനൊപ്പം വിദ്യാഭ്യാസ മേഖലയിലെ പ്രമുഖരെ ഉള്‍പ്പെടുത്തി കൊണ്ട്   മൂന്ന്‍ ദിവസം നീണ്ടു നില്‍ക്കുന്ന  പ്രദർശനത്തിൽ സെമിനാറുകളുമുണ്ടാവും. യു.എ.ഇ  സുപ്രീം കൗണ്‍സില്‍ അംഗവും അജ്മാന്‍ ഭരണാധികാരിയുമായ ശൈഖ് ഹുമൈദ്‌ ബിന്‍ റാഷിദ്‌ അല്‍ നുഐമിയുടെ മേല്‍നോട്ടത്തില്‍  നടത്തുന്ന മേളയിൽ യു.എ.ഇ ക്ക് പുറമേ , ബഹറൈന്‍, ജോര്‍ദാന്‍, ഒമാന്‍, മലേഷ്യ, നൈജീരിയ  തുടങ്ങിയ രാജ്യങ്ങളില്‍ നിന്നായി  നിരവധി കോളേജുകളും യുണിവേഴ്സിറ്റികളും  പങ്കെടുക്കും.   രാവിലെ ഒന്‍പതു മുതല്‍ വൈകീട്ട് അഞ്ചു വരെയാണ് പ്രദര്‍ശന സമയം. രാഷ്​ട്രപിതാവ്​ ശൈഖ് സായിദ് ബിൻ സുൽത്താൻ അൽ നഹിയാന്‍  വിദ്യാഭ്യാസ മേഖലയിൽ നടത്തിയ പരിശ്രമങ്ങളെ എടുത്തു കാണിക്കുന്ന പ്രദര്‍ശനവും മേളക്ക് മാറ്റ് കൂട്ടും. വിദ്യാഭ്യാസ മന്ത്രാലയം ഈ പ്രദര്‍ശനത്തിനു നല്‍കുന്ന പിന്തുണക്ക്​  അജ്മാന്‍  ചേംബര്‍ ഓഫ് കൊമേഴ്സ്‌ എക്സിക്യുട്ടീവ്‌ ഡയറക്ടര്‍ നാസര്‍ അല്‍ ദാഫരി നന്ദി പറഞ്ഞു. ഇത്തിസലാത്ത്‌, സിറ്റി യുണിവേഴ്സിറ്റി കോളേജ് ഓഫ് അജ്മാന്‍, തുടങ്ങിയ സ്ഥാപനങ്ങള്‍ പരിപാടിയുമായി സഹകരിക്കുന്നുണ്ട്.