എജുകഫെ മൂന്നാം എഡിഷൻ;  രജിസ്​ട്രേഷൻ മുതൽ സമ്മാനപ്പെരുമഴ

ദുബൈ: പഠനവും പഠിപ്പിക്കലും രസകരമായ അനുഭമാണെന്ന്​ തെളിയിച്ച ‘എജുകഫെയുടെ മൂന്നാമത്​ എഡിഷനിൽ കുട്ടികളെ കാത്തിരിക്കുന്നത്​ സമ്മാന പെരുമഴ. ‘ഗള്‍ഫ് മാധ്യമം’ഒരുക്കുന്ന സമ്പൂര്‍ണ വിദ്യാഭ്യാസ-കരിയര്‍ മേളക്ക്​ കൊടിയുയരും മു​േമ്പ സമ്മാനങ്ങൾ കിട്ടിത്തുടങ്ങും. ആദ്യം രജിസ്​റ്റർ ചെയ്യുന്ന ആയിരം പേർക്കാണ്​ സമ്മാനത്തിന്​ അർഹത. ഏത്​ തരം കഴിവുള്ള കുട്ടിക്കും നാളെ ആരാകണമെന്ന ചോദ്യത്തിന്​ ഒരു കാപ്പികുടിക്കുന്നത്ര ലാഘവത്തോടെ ഉത്തരം കണ്ടെത്താനാവും വിധമാണ്​ എജുകഫെയുടെ മൂന്നാം​ എഡിഷൻ ഒരുക്കിയിരിക്കുന്നത്​. 2018 ജനുവരി 12,13 തീയതികളില്‍ ദുബൈ മുഹൈസ്​ന ഇന്ത്യൻ അക്കാദമി സി.ബി.എസ്​.ഇ സ്​കൂളിൽ നടക്കുന്ന മേളയില്‍ പ്ളസ് ടുവിന് ശേഷമുള്ള പഠനവഴികളും പ്രവേശ മാര്‍ഗങ്ങളും കണ്ടെത്താം.  ഉപദേശ നിര്‍ദേശങ്ങളുമായി പ്രമുഖരായ വിദ്യഭ്യാസ വിദഗ്​ധരും പ്രചോദക പ്രഭാഷകരും കരിയര്‍ ഉപദേശകരും നിങ്ങൾക്കൊപ്പമെത്തും.

യു.എ.ഇയിലെയും ഇന്ത്യയിലെയും വിദേശ സര്‍വകലാശാലകള്‍ ഉള്‍പ്പെടെ ഡസൻ കണക്കിന്​ പ്രമുഖ വിദ്യാഭ്യാസ സ്ഥാപനങ്ങൾ അവരുടെ കോഴ്​സുകളും  പ്രവേശ നടപടികളും മറ്റും നേരിട്ട്​ മനസിലാക്കിത്തരാൻ ഇവിടെ എത്തുന്നുണ്ട്​​. വിദ്യാഭ്യാസ-തൊഴില്‍ മേഖലയിലെ നാളെയുടെ സാധ്യതകൾ എന്തെന്ന്​ അറിഞ്ഞ്​ ഏറ്റവും പുതിയ കോഴ്​സുകളും മറ്റും അഭിരുചിക്കനുസരിച്ച് തെരഞ്ഞെടുക്കാനും സൗകര്യമുണ്ടാകും. മേളയിൽ കുട്ടികളുടെ മാനസിക-ബൗദ്ധിക ക്ഷമത വിലയിരുത്താനുമാവും. രക്ഷിതാക്കള്‍ക്കായി പ്രത്യേക ക്ലാസുകളും കൗണ്‍സലിങ്ങും ഒരുക്കിയിട്ടുണ്ട്​. കുടുംബസമേതം വന്ന് ഉല്ലാസകരമായ അന്തരീക്ഷത്തില്‍ കുട്ടികളുടെ ഭാവിയിലേക്കുള്ള സുപ്രധാന ചുവടുവെപ്പിനുള്ള അവസരമാണ് ഗള്‍ഫ് മാധ്യമം ഒരുക്കുന്നത്. കുട്ടികള്‍ക്കായി ബുദ്ധിപരമായ കളികളും വിനോദങ്ങളും മേളയോടനുബന്ധിച്ച് ഒരുക്കുന്നുണ്ട്. വിജയികള്‍ക്ക് സമ്മാനങ്ങളും ലഭിക്കും. പ്രവേശം സൗജന്യമാണ്. www.click4m.com, www.gulfmadhyamam.com എന്നീ വെബ്​ സൈറ്റുകളിലെ എജുകഫെ ലിങ്കില്‍  രജിസ്​റ്റര്‍ ചെയ്യാം. പങ്കെടുക്കുന്ന എല്ലാവര്‍ക്കും പ്രോത്സാഹന സമ്മാനങ്ങളും ഒരുക്കിയിട്ടുണ്ട്​.