ഫുജൈറയിൽ നേരിയ ഭൂചലനം

ഫുജൈറ: തിങ്കളാഴ്ച പുലർച്ചെ ഫുജൈറയിൽ ചെറിയ രീതിയില്‍ ഭൂചലനം ഉണ്ടായതായി ദേശീയ കാലാവസ്ഥാ വകുപ്പ് (എൻ‌.സി‌.എം) അറിയിച്ചു. റിക്ടർ സ്കെയിലിൽ 3.1 തീവ്രത രേഖപ്പെടുത്തിയ ഭൂകമ്പം ഇന്ന് പുലർച്ചെ 4:54 ന് ദിബ്ബ അൽ ഫുജൈറയിൽ ആണ് രേഖപ്പെടുത്തിയത്. അഞ്ചു കിലോമീറ്റർ ആഴത്തിലാണ് ഭൂചലനം ഉണ്ടായത്.

രാവിലെ നമസ്കാരം കഴിഞ്ഞ് ഖുര്‍ആന്‍ പാരായണം ചെയ്തിരിക്കുന്ന സമയത്താണ് ഭൂചലനം അനുഭവപ്പെട്ടതെന്ന് ദിബ്ബയില്‍ ജോലിചെയ്യുന്ന മുഹമ്മദ്‌ ഫായിസ്, അഷ്‌റഫ്‌ അലി എന്നിവര്‍ അറിയിച്ചു. ചെറിയ ഒരു ശബ്ദത്തോട് കൂടി വീടിന്‍റെ ചുമരുകള്‍ നല്ല രീതിയില്‍ കുലുങ്ങിയതായി ഇവര്‍ പറഞ്ഞു.