ദുബൈ ഉമ്മുസുഖൈം സ്​ട്രീറ്റിൽ പുതിയ തുരങ്കപാത തുറന്നു

ദുബൈ: നഗരത്തിലെ ഉമ്മുസുഖൈം സ്​ട്രീറ്റിലൂടെയുള്ള ഗതാഗതം കൂടുതൽ സുഗമമാക്കുന്നതിന്‍റെ ഭാഗമായി നിർമിച്ച പുതിയ തുരങ്കപാത ഗതാഗതത്തിനായി തുറന്നു നൽകി ദുബൈ റോഡ്​ ഗതാഗത അതോറിറ്റി (ആർ.ടി.എ). 800 മീറ്റർ നീളമുള്ള ടണലിൽ ​ ഇരു ദിശയിലേക്കും നാലു ലൈനുകൾ വീതമാണുള്ളത്​​​. അൽഖൈൽ റോഡിലെ ഇന്‍റർസെക്ഷനിൽ നിന്ന് ശൈഖ്​ മുഹമ്മദ് ബിൻ സായിദ് റോഡ്​ ജംഗ്ഷൻ വരെ നീളുന്ന ഉമ്മുസുഖൈം സ്ട്രീറ്റ് വികസന പദ്ധതിയുടെ പ്രധാന ഭാഗമാണ് ഈ തുരങ്കം. ഇതു വഴി ശൈഖ്​ മുഹമ്മദ്​ ബിൻ സായിദ്​ റോഡിനും അൽ ഖൈൽ റോഡിനും ഇടയിലുള്ള യാത്ര സമയം 61 ശതമാനം വരെ കുറയും. അതായത്​ ഇതുവഴിയുള്ള യാത്ര സമയം​ 9.7 മിനിറ്റിൽ നിന്ന്​ 3.8 മിനിറ്റായി ചുരുങ്ങും.

കൂടാതെ ഇരു ദിശയിലേക്കും സഞ്ചരിക്കാവുന്ന വാഹനങ്ങളുടെ എണ്ണം മണിക്കൂറിൽ 16,000 ആയി ഉയരും. അൽ ബർഷ സൗത്ത്​ 1, 2, 3, ദുബൈ ഹിൽസ്​, അർജാൻ, ദുബൈ സയൻസ്​ പാർക്ക്​ തുടങ്ങി നിരവധി റസിഡൻഷ്യൽ, വികസന മേഖലകളിലെ 10 ലക്ഷത്തിന്​ മുകളിൽ ജനങ്ങൾക്ക്​ ​ പുതിയ പാത ഉപകാരപ്പെടുമെന്ന്​ ആർ.ടി.എ ചെയർമാൻ മതാർ അൽ തായർ പറഞ്ഞു. ദുബൈയിലെ നാല്​ പ്രധാന ഇടനാഴികളായ ശൈഖ്​ സായിദ്​ റോഡ്​, അൽഖൈൽ റോഡ്​, ശൈഖ്​ മുഹമ്മദ്​ ബിൻ സായിദ്​ റോഡ്​, എമിറേറ്റ്​സ്​ റോഡ്​ എന്നിവ തമ്മിലുള്ള ബന്ധം ഇതു വഴി മെച്ചപ്പെടും.

പദ്ധതിയിലുടനീളം സ്മാർട്ട്​ സാ​ങ്കേതിക വിദ്യകളാണ്​ ഉപയോഗപ്പെടുത്തിയിരുന്നത്​. നിർമാണ വിവരങ്ങൾ തൽസമയം ശേഖരിക്കാനും വിശകലനം നടത്താനും നിർമിത ബുദ്ധി (എ.​ഐ) സഹായത്തോടെയുള്ള ഡ്രോണുകൾ ഉപയോഗപ്പെടുത്തി. ഇത്​ തീരുമാനമെടുക്കലുകളുടെ വേഗത വർധിപ്പിക്കുകയും നിർമാണ സൈറ്റുകളുടെ കാര്യക്ഷമത വർധിപ്പിക്കുകയും ഫീൽഡ്​ സർവേ സമയം 60 ശതമാനം വരെ കുറക്കാനും സാധിച്ചു. നിർമാണ പുരോഗതി ട്രാക്ക്​ ചെയ്യാൻ ടൈം ലാപ്സ്​ ഇമേജിങ്​ ഉപയോഗിച്ചത്​ വഴി നിരീക്ഷണങ്ങളുടെ കാര്യക്ഷമത 40 ശതമാനം വരെ വർധിപ്പിക്കാനായി. 2013ൽ പദ്ധതിയുടെ ആദ്യ ഘട്ടം ആർ.ടി.എ പൂർത്തിയാക്കിയിരുന്നു. രണ്ടാം ഘട്ട വികസന പ്രവർത്തനങ്ങളാണ്​ ഇപ്പോൾ പുരോഗമിക്കുന്നത്​.

അൽഖൈൽ റോഡ്​ മുതൽ ശൈഖ്​ മുഹമ്മദ്​ ബിൻ സായിദ്​ ഇന്‍റർസെക്ഷൻ വരെ നീളുന്ന 4.6 കിലോമീറ്റർ നീളത്തിലാണ്​ ഉമ്മുസുഖൈം സ്​ട്രീറ്റ്​ വികസന പദ്ധതി നടപ്പിലാക്കുന്നത്​. കിങ്​സ്​ സ്കൂളിന്​ സമീപത്തായി അൽ ബർഷ സൗത്ത്​ സ്​ട്രീറ്റിനോട്​ ചേർന്നുള്ള ഉമ്മുസുഖൈം സ്​ട്രീറ്റ്​ ഇന്‍റർസെക്ഷൻ വികസനമാണ്​ ഇതിൽ പ്രധാനം.