തീരശുചീകരണ ദിനം: ദുബൈയിൽ  നീക്കിയത്​ 550 കിലോ മാലിന്യം

ദുബൈ: നഗരസഭയുടെ പരിസ്​ഥിതി വിഭാഗം സംഘടിപ്പിച്ച അന്താരാഷ്​ട്ര തീര ശുചീകരണ ദിനാചരണത്തിന്​ മികച്ച പങ്കാളിത്തം. സ്​കൂൾ കുട്ടികളും സർക്കാർ^സ്വകാര്യ സംഘടനകളിൽ നിന്നും 600 സന്നദ്ധ പ്രവർത്തകരാണ്​ തീര ശുചീകരണത്തി​െനത്തിയത്​. ഇവർ ഒത്തു ചേർന്നപ്പോൾ 550 കിലോ മാലിന്യം ശേഖരിച്ച്​ നീക്കം ചെയ്യാനായി.  ​ജബൽ അലി മറൈൻ സാഞ്ചുറിയുടെ തീരത്തായി നാലു കിലോമീറ്റർ ഭാഗത്താണ്​ ശുചീകരണം നടത്തിയതെന്ന്​ പരിസ്​ഥിതി വിഭാഗം ഡയറക്​ടർ ആലിയ അൽ ഹർമൂദി പറഞ്ഞു. 

തീരമേഖലയുടെ പ്രാധാന്യവും അവ നേരിടുന്ന ഭീഷണിയും ബോധ്യപ്പെടുത്താനാണ്​ ദിനാചരണത്തിൽ ലക്ഷ്യമിട്ടത്​. ശേഖരിച്ച മാലിന്യത്തിൽ 65 ശതമാനവും പ്ലാസ്​റ്റിക്കാണ്​. റബർ, കയറുകൾ, മരം, കുപ്പികൾ, ഷൂ, ഷർട്ട് തുടങ്ങിയവയും മാലിന്യക്കൂട്ടത്തിലുണ്ട്​. സ്​ക്യൂബാ ​െഡെവർമാർ വെള്ളത്തിൽ നിന്ന്​ ലോഹമാലിന്യങ്ങൾ, മീൻപിടിത്ത ഉപകരണങ്ങൾ എന്നിവയും കണ്ടെത്തി. 

സെക്കൻറ്​ ഡിസംബർ, അൽ സലാം, അറബ്​ യൂനിറ്റി, കേംബ്രിഡ്​ജ്​ ഇൻറർനാഷനൽ, ഡി.പി.എസ്​, ദുബൈ ജെം എന്നീ സ്​കൂളുകളിൽ നിന്ന്​ 250 വിദ്യാർഥികൾ ഇൗ മാസം 26നും വിവിധ സ്​ഥാപനങ്ങളിലെ 350 വളണ്ടിയർമാർ പിറ്റേ ദിവസവും സേവനം ചെയ്​തു.  പ്ലാസ്​റ്റിക്​ മാലിന്യം വർഷങ്ങളോളം സമുദ്രത്തിന്​ ദോഷം സൃഷ്​ടിക്കുമെന്നതിനാൽ സമുദ്രമേഖലയിലെ ഉപയോഗം തടയാൻ ബോധവത്​കരിക്കേണ്ടത്​ അത്യാവശ്യമാണെന്ന്​ പ്രകൃതി വിഭവ സംരക്ഷണ വിഭാഗം മേധാവി ​െഎശ അൽ മുർ അൽ മുഹൈറി പറഞ്ഞു.