ദുബൈ മെട്രോ  ജെ.എൽ.ടി- ഇബ്​നു ബത്തൂത്ത റൂട്ടിൽ ഒാട്ടം നിർത്തിവെക്കുന്നു

ദുബൈ: ജെ.എൽ.ടിക്കും ഇബ്​നു ബത്തൂത്ത സ്​റ്റേഷനും ഇടയിലെ ​മെട്രോ സേവനം ജനുവരി അഞ്ചു മുതൽ താൽകാലികമായി നിർത്തിവെക്കും. ഇൗ മേഖലയിലെ യാത്രക്കാർക്കായി ആവശ്യാനുസരണം സൗജന്യ ബസ്​ സർവീസ്​ പകരമായി ഏർപ്പെടുത്തും.  എക്​സ്​പോ 2020 വേദിയിലേക്കുള്ള 15 കിലോമീറ്റർ നീളുന്ന റൂട്ട്​2020 നിർമാണാവശ്യാർഥമാണ്​ ഇൗ മാറ്റമെന്ന്​ റോഡ്​ ഗതാഗത അതോറിറ്റി (ആർ.ടി.എ) റെയിൽ വിഭാഗം സി.ഇ.ഒ അബ്​ദുൽ മുഹ്​സിൻ ഇബ്രാഹിം യൂനുസ്​ വ്യക്​തമാക്കി. 2019 പകുതി വരെ ഇൗ സ്​റ്റേഷനുകൾക്കിടയിൽ മെട്രോ ഒാട്ടം ഉണ്ടാവില്ല. നഖീൽ ഹാർബർ-ടവർ സ്​റ്റേഷനുകളു​മായി ബന്ധിപ്പിച്ച്​ ഏറെ ജനസാന്ത്രതയുള്ള മേഖലകളിലൂടെയാണ്​ നിർമാണം പുരോഗമിക്കുന്നത്​. ഇതിനു പുറമെ സ്​റ്റേഷനും നിർമിക്കേണ്ടതുണ്ട്​. 

സ്​റ്റേഷനും അതിനു സമീപമുള്ള ബഹുനില കാർ പാർക്കിങും അടച്ചിടേണ്ടി വരും. യു.എ.ഇ എക്​സ്​ചേഞ്ച്​ ഭാഗത്തേക്ക്​ പോകുന്ന യാത്രക്കാർ ജെ.എൽ.ടിയിൽ ഇറങ്ങി പുറത്തു നിർത്തിയിട്ടിരിക്കുന്ന ബസിൽ ഇബ്​ന്​ ബത്തൂത്തയിൽ എത്തി അവിടെ നിന്ന്​ യാത്ര തുടരാം. റാഷിദിയ ഭാഗത്തേക്ക്​ പോകുന്നവർ ഇബ്​നു ബത്തൂത്തയിൽ ഇറങ്ങി ബസിൽ ​െജ.എൽ.ടിയിലേക്ക്​ പോകണം.  11.8 കിലോമീറ്റർ ​ട്രാക്ക്​ ഉയരത്തിലും 3.2 കിലോമീറ്റർ ട്രാക്ക്​ ഭൂമിക്കടിയിലുമായാണ്​ റൂട്ട്​2020 നിർമാണം. ഇതിനിടയിൽ ഏഴു സ്​റ്റേഷനുകളുമുണ്ടാവും. എക്​സ്​പോ 2020 സൈറ്റിന്​ സമീപത്തായി ട്രെയിൻ പാലങ്ങളുടെ കാലുകളും കാണാം.