ദുബൈയിൽ ഇ-സ്കൂട്ടറുകൾക്ക്​ ബാറ്ററി മാറ്റാൻ സൗകര്യമൊരുങ്ങുന്നു

ദുബൈ: എമിറേറ്റിൽ ഡെലിവറി സർവിസ്​ നടത്തുന്ന ഇ-സ്കൂട്ടറുകൾക്ക് ഇനി​ ചാർജ്​ തീർന്നാൽ റീചാർജ്​ ചെയ്യേണ്ടിവരില്ല. പകരം ഫുൾ ചാർജുള്ള ബാറ്ററി തന്നെ മാറ്റിവെക്കാം. ഇതിനായി ​പ്രധാന സ്ഥലങ്ങളിലെല്ലാം ബാറ്ററി സ്വാപ്പിങ്​ കേന്ദ്രങ്ങൾ സ്ഥാപിക്കാനാണ്​ ദുബൈ റോഡ്​ ഗതാഗത അതോറിറ്റിയുടെ തീരുമാനം.

മെന ആസ്ഥാനമായി പ്രവർത്തിക്കുന്ന ബി2ബി മൈക്രോ മൊബിലിറ്റി ടെക്​ സ്റ്റാർട്ടപ് ആയ ടെറ ടെക്കുമായി കൈകോർത്താണ്​ പദ്ധതി നടപ്പാക്കുക. ​കഴിഞ്ഞ ദിവസം ഇതു സംബന്ധിച്ച കരാറിൽ ഇരു സ്ഥാപനങ്ങളും ഒപ്പു​വെച്ചു. കരാർ പ്രകാരം ദുബൈയിൽ ഇ-സ്കൂട്ടറുകൾ സർവിസ്​ നടത്തുന്ന പ്രധാന മേഖലകളിലെല്ലാം ബാറ്ററി സ്വാപ്പിങ്​ കേന്ദ്രങ്ങൾ ടെറ ടെക്​ സ്ഥാപിക്കും.

ദുബൈയിൽ സുസ്​ഥിരമായ ഗതാഗത മാർഗങ്ങൾ സ്വീകരിക്കുന്നത്​ പ്രോത്സാഹിപ്പിക്കുകയും പരിസ്ഥിതി സൗഹൃദപരമായ ബദൽ മാർഗങ്ങൾ ഉപയോഗിക്കാൻ ഡെലിവറി കമ്പനികളെ പ്രേരിപ്പിക്കുകയും ചെയ്യുകയാണ്​ സംരംഭത്തിന്‍റെ ലക്ഷ്യം. കാർബൺ രഹിത വാഹനങ്ങളുടെ ഉപയോഗം പ്രോത്സാഹിപ്പിക്കുന്നതിനായി മേഖലയിൽ ആരംഭിച്ച ആദ്യ പദ്ധതിയാണിതെന്ന്​ ആർ.ടി.എ പ്രസ്താവനയിൽ വ്യക്​തമാക്കി.

ഡെലിവറി മേഖലയെ പിന്തുണക്കുന്നതിനൊപ്പം സേവനദാതാക്കളുടെ ആവശ്യം അനുസരിച്ച്​ സമഗ്രമായ ചാർജിങ്​ പരിഹാരങ്ങൾക്കായി സംയോജിത സംവിധാനങ്ങൾ വികസിപ്പിക്കു​കയെന്നതാണ്​ ടെറ ടെക്കുമായുള്ള പങ്കാളിത്ത കരാറിലൂടെ ലക്ഷ്യമിടുന്നത്​. ഡെലിവറി കമ്പനികളുടെ പ്രവർത്തന ചെലവ്​ കുറച്ച്​ പരിസ്ഥിതി സൗഹൃദപരമായ ഇലക്​ട്രിക്​ വഹനങ്ങളിലേക്ക്​ മാറാൻ ഡെലിവറി മേഖലയെ പദ്ധതി ശക്​തിപ്പെടുത്തും.

എമിറേറ്റിലെ 36 സ്ഥലങ്ങളുടെ അടിസ്ഥാന സൗകര്യങ്ങൾ വികസിപ്പിക്കുന്നതിലൂടെ കാർബൺ ബഹിർഗമനം 30 ശതമാനത്തോളം കുറക്കുകയെന്ന കൊമേഴ്​സ്യൽ ആൻഡ്​ ലോജിസ്റ്റ്​സ്​ ലാൻഡ്​ ട്രാൻസ്​പോർട്ട്​ സ്​ട്രാറ്റജി 2030ന്‍റെ ലക്ഷ്യങ്ങളോട്​ ചേർന്നു നിൽക്കുന്നതാണ്​ പുതിയ സംരംഭമെന്ന്​ ആർ.ടി.എയുടെ ലൈസൻസ്​ ഏജൻസി സി.ഇ.ഒ അഹമ്മദ്​ മെഹബൂബ്​ പറഞ്ഞു.