ലാഭത്തിൽ കുതിപ്പ്​ തുടർന്ന്​ ദുബൈ ടാക്സി

ദുബൈ: കഴിഞ്ഞ വർഷം ദുബൈ ടാക്സി നേടിയത്​ 54 ശതമാനം ലാഭവർധന. 34.53 കോടി ദിർഹമാണ്​ 2023ൽ കമ്പനി നേടിയ അറ്റ ലാഭം. വരുമാനത്തിൽ 11 ശതമാനം വർധന നേടാനായതാണ്​ അറ്റ ലാഭം വർധിക്കാൻ കമ്പനിക്ക്​ തുണയായത്​. സർവിസ്​ നടത്തുന്ന വാഹനങ്ങുടെ എണ്ണം 7,300 ആയി ഉയർത്താനായതാണ്​ ലാഭം കുതിച്ചുയരാൻ കാരണം. ദുബൈ ഫിനാഷ്യ മാർക്കറ്റിൽ ലിസ്റ്റ്​ ചെയ്ത കമ്പനി പ്രാഥമിക ഓഹരി വിൽപന (ഐ.പി.ഒ)യും നടത്തിയിരുന്നു. കഴിഞ്ഞ സാമ്പത്തിക വർഷത്തിന്‍റെ നാലാം പാദത്തിൽ ഡിവിഡന്‍റായി 7.1 കോടി ദിർഹം ഓഹരി ഉടമകൾക്ക്​ നൽകാനും ഡി.ടി.സി ബോർഡ്​ അനുമതി നൽകിയിരുന്നു. ഓഹരി ഒന്നിന്​ 2.84 ഫിൽസ്​ വെച്ച്​ ഈ വർഷം ഏപ്രിലിൽ വിതരണം ചെയ്യാനാണ്​ തീരുമാനം. വാഹനങ്ങളുടെ എണ്ണം കൂട്ടി ദുബൈ കൂടാതെ മറ്റ്​ എമിറേറ്റുകളിലേക്കും സർവിസ്​ വ്യാപിപ്പിക്കാനും കമ്പനിക്ക്​ പദ്ധതിയുണ്ടെന്ന്​ ഡി.ടി.സി ചീഫ്​ ഓപറേറ്റിങ്​ ഓഫിസർ മൻസൂർ റഹ്​മ അൽഫലാസി പറഞ്ഞു. ജനങ്ങളെ പരസ്പരം ബന്ധിപ്പിക്കുന്നതിലും ലോക നിലവാരമുള്ള ഗതാഗത അടിസ്ഥാന സൗകര്യ വികസനത്തിലും മുഖ്യ പങ്കാണ്​ ഡി.ടി.സി വഹിക്കുന്നതെന്നും അദ്ദേഹം കൂട്ടിച്ചേർത്തു.

2023ൽ 4.6 കോടി ട്രിപ്പുകളാണ്​ ഡി.ടി.സി നടത്തിയത്​. തൊട്ടു മുമ്പുള്ള വർഷത്തെ അപേക്ഷിച്ച്​ എട്ടു ശതമാനം വർധനവ്​ രേഖപ്പെടുത്തിയിട്ടുണ്ട്​. ഡി.ടി.സിയെ സംബന്ധിച്ച്​ ഈ വർഷവും സുപ്രധാനമായ വളർച്ച നേടുമെന്നാണ്​ പ്രതീക്ഷ. കാരണം ലോകത്തെ പ്രധാന വിനോദ സഞ്ചാര കേന്ദ്രമായി വളരുന്ന ദുബൈയിൽ അതിനുള്ള എല്ലാ സാഹചര്യങ്ങളും ഉണ്ടെന്നും അദ്ദേഹം വ്യക്​തമാക്കി.