സ്വകാര്യ വ്യക്​തികളിൽനിന്ന്​ മൃഗങ്ങളെ മാറ്റിയത്​ ദുബൈ സഫാരി പാർക്കിലേക്ക്

ദുബൈ: വന്യജീവികളെയും അപകടകാരികളായ മറ്റു മൃഗങ്ങളെയും വീടുകളിൽ വളർത്തുന്നത്​ വിലക്കിക്കൊണ്ടുള്ള ഫെഡറൽ നിയമത്തോടെ പലയിടങ്ങളിൽനിന്നായി ഒഴിപ്പിക്കപ്പെട്ട മൃഗങ്ങ​െള മാറ്റിയത്​ ദുബൈ സഫാരി പാർക്കിലേക്ക്​. ചിമ്പാൻസികൾ, കുരങ്ങുകൾ, സിംഹങ്ങൾ, പക്ഷികൾ തുടങ്ങിയ ജീവികളെയാണ്​ കൂടുതലായും​ കൈമാറിയത്​.

നിയമം പ്രാബല്യത്തിലായി 16 മാസത്തിനിടെ 20ഒാളം കുരങ്ങുകളെയാണ്​ ദുബൈ സഫാരി പാർക്കിന്​ ലഭിച്ചത്​. ഇവയിൽ കൂടുതലും സിംഹവാലൻ കുരങ്ങുകളും വാലില്ലാ കുരങ്ങുകളുമാണ്​. സ്വകാര്യ വ്യക്​തികളുടെ വീടുകളിൽനിന്ന്​ കണ്ടെടുത്ത ഇവയിൽ പലതിനും അമിത ഭാരം, ശോഷിപ്പ്​, പെരുമാറ്റത്തിലെ അസ്വാഭാവികത തുടങ്ങിയ പ്രശ്​നങ്ങളുണ്ടായിരുന്നുവെന്ന്​ ദുബൈ സഫാരി അധികൃതർ വ്യക്​തമാക്കി. നവംബറിൽ തുറന്നത്​ മുതൽ ദിവസേന 3000 പേർ പാർക്ക്​ സന്ദർശിക്കുന്നതായി അധികൃതർ പറയുന്നു.

വന്യജീവികളെയും അപകടകാരികളായ മറ്റു മൃഗങ്ങളെയും വീട്ടിൽ സൂക്ഷിക്കുന്നത്​ വിലക്കിക്കൊണ്ടുള്ള ഫെഡറൽ നിയമം പ്രാബല്യത്തിലായിട്ട്​ 16 മാസമായി. മൃഗശാലകൾ, വന്യജീവി പാർക്കുകൾ, സർക്കസ്​ കമ്പനികൾ, ഗവേഷണ കേന്ദ്രങ്ങൾ എന്നിവക്ക്​ മാത്രമേ ഇത്തരം മൃഗങ്ങളെ ​ൈകവശം വെക്കാൻ അനുമതിയുള്ളൂ എന്നാണ്​ നിയമം അനുശാസിക്കുന്നത്​. മൃഗങ്ങളെ ഇറക്കുമതി ചെയ്യുന്നതിന്​ മറ്റു അതോറിറ്റികൾക്കുണ്ടായിരുന്ന പെർമിറ്റുകൾ നിയമം റദ്ദാക്കുകയും ​െചയ്​തിരുന്നു.

ഇത്തരം മൃഗങ്ങളെ വീട്ടിൽ വളർത്തിയാൽ ജീവപര്യന്തം തടവും ദശലക്ഷം ദിർഹം വരെ പിഴയും ലഭിക്കുന്ന വിധം കർശനമാക്കിയാണ് നിയമം അവതരിപ്പിച്ചത്​. കടുവയെയും സിംഹത്തെയും വരെ വീട്ടിൽ ഓമനിച്ചുവളർത്തുന്ന ശീലമുള്ളവരാണ് അറബികൾ. ഈ പ്രവണതക്ക് കർശനമായി കടിഞ്ഞാണിടുന്നതാണ്​ നിയമം. കടുവ, പുലി, സിംഹം, കുരങ്ങുകൾ, ആൾക്കുരങ്ങുകൾ മുതൽ മാസ്​റ്റിഫ്, പിറ്റ് ബുൾ, ജപ്പാനീസ്​ ടോസ തുടങ്ങിയ ഇനം നായകൾക്ക് വരെ വിലക്ക് ബാധകമാണ്.

മൃഗങ്ങളുടെ ആക്രമണത്തിനിരയായി ആരെങ്കിലും മരിച്ചാൽ ഉടമസ്​ഥന് ജീവപര്യന്തം തടവ് അനുഭവിക്കേണ്ടി വരും. മൃഗങ്ങൾ മറ്റുള്ളവർക്ക് ശാരീരിക വൈകല്യത്തിന് കാരണമാകുംവിധം പരിക്കേൽപ്പിച്ചാൽ ഏഴ് വർഷമാണ് തടവ്. ചെറിയ പരിക്കേൽപിച്ചാൽ ഒരു വർഷം വരെ തടവും പതിനായിരം ദിർഹം വരെ പിഴയും ലഭിക്കും.