1.40 കോടി ദിർഹം കവർന്നവരെ  12 മണിക്കൂറുകൊണ്ട്​ പിടികൂടി

ദുബൈ: 1.40 കോടി ദിർഹം കൊള്ളയടിച്ച സംഭവത്തിൽ ഒമ്പതംഗ സംഘത്തെ ദുബൈ പൊലീസ്​ പിടികൂടി. മോഷണം നടന്ന്​ 12 മണിക്കൂറിനകമാണ്​ ഒമ്പതംഗ ഏഷ്യൻ സംഘത്തെ സമീപ എമിറേറ്റിൽ നിന്ന്​ പിടികൂടിയതെന്നും പണം കണ്ടെടുത്തതായും കുറ്റാന്വേഷണ വിഭാഗം മേധാവി മേജർ ജനറൽ ഖലീൽ ഇബ്രാഹിം അൽ മൻസൂരി അറിയിച്ചു. എ.ടി.എം യന്ത്രത്തിൽ നിറക്കാൻ പണം കൊണ്ടുപോകുന്ന വാഹനത്തിൽ നിന്ന്​ മോഷണം നടന്നതായി ലഭിച്ച ഫോൺ സന്ദേശത്തെ തുടർന്നാണ്​ പൊലീസ്​ അന്വേഷണം ആരംഭിച്ചത്​. വ്യാഴാഴ്​ച മുറഖബാത്ത്​ മേഖലയിലായിരുന്നു സംഭവം. പണം തട്ടിയെടുത്ത സംഘം അജ്​ഞാത സ്​ഥലത്തേക്ക്​ മുങ്ങുകയായിരുന്നു. 
അന്വേഷണത്തിനും പ്രതികളെ പിടികൂടുന്നതിനും വ്യത്യസ്​ത സംഘങ്ങൾക്ക്​ രൂപം നൽകിയാണ്​ മുന്നോട്ടുനീങ്ങിയതെന്ന്​ അന്വേഷണ വിഭാഗം മേധാവി കേണൽ അദീൽ അൽ ജോക്കർ പറഞ്ഞു. വ്യവസായ മേഖലയിൽ ഒളിച്ചു നിന്ന സംഘത്തെ 12 മണിക്കൂറിനകം കണ്ടെത്തി അറസ്​റ്റു ചെയ്യാനുമായി.  ഇത്തരം കുറ്റകൃത്യങ്ങൾ നടത്തുന്നവരെ അമർച്ച ചെയ്യാൻ ദുബൈ പൊലീസ്​ സർവസജ്ജമാണെന്ന്​ കേണൽ അൽ ജോക്കർ പറഞ്ഞു.   മോഷണം സാധ്യമാവാത്ത രീതിയിലുള്ള സുരക്ഷാ സംവിധാനങ്ങളുള്ള പണ സഞ്ചികൾ ഉപയോഗിക്കണമെന്ന്​ പണമിടപാട്​ സ്​ഥാപനങ്ങൾക്ക്​ നിർദേശം നൽകാൻ ദുബൈ പൊലീസ്​ തീരുമാനിച്ചിരുന്നു. അടുത്ത വർഷത്തോടെ ഇൗ നിബന്ധന കർശനമാക്കും. മോഷണത്തിന്​ ശ്രമിച്ചാൽ അലാറം ശബ്​ദിക്കുന്നതും ജി.പി.എസ്​ സംവിധാനം കൊണ്ട്​ ട്രാക്ക്​ ചെയ്യാൻ പറ്റുന്നതുമാണ്​ ബാഗുകൾ.