ദുബൈ പൊലീസ്​ സേവനങ്ങൾക്ക്​ ‘അംന’ സഹായിക്കും

ദുബൈ: പൊലീസ്​ സ്​റ്റേഷനിൽ ആവശ്യങ്ങൾക്ക്​ പോകു​േമ്പാൾ പരിചയമുള്ള ആളുകളെ കൂട്ടിപ്പോകുന്ന പതിവുണ്ട്​ നമ്മുടെ നാട്ടിൽ. എന്നാൽ ദുബൈ പൊലീസ്​ സേവനം തേടാൻ അങ്ങിനെ ആളുകളുടെ ആവശ്യമില്ല. സഹായിക്കാനായി ദുബൈ പൊലീസ്​ ആർട്ടിഫിഷൽ ഇൻറലിജൻസ്​ വിഭാഗം ഒരുക്കിയ അംനയുടെ സഹായം ഏതു സമയവും ലഭിക്കുകയും ചെയ്യും.

സർട്ടിഫിക്കറ്റുകൾ, രാത്രി പ്രവൃത്തികൾക്കുള്ള അനുമതി, പരാതികൾ, സംശയങ്ങൾ എന്നിവക്കെല്ലാം സ്​മാർട്ട്​ ആപ്പ്​ മതിയാകുമെന്നും അംന എന്ന വിർച്വൽ സഹായിയുടെ മാർഗനിർദേശം ലഭിക്കുമെന്നും നിർമിത ബുദ്ധി വകുപ്പ്​ ഡി.ജി ബ്രിഗേഡിയർ ഖാലിദ്​ നാസർ അൽ റസൂഖി വ്യക്​തമാക്കി. ദുബൈ പൊലീസ്​ സ്​മാർട്ട്​ ആപ്പ്​ തുറക്കു​േമ്പാൾ തന്നെ സഹായവാഗ്​ദാനവുമായി അംന പ്രത്യക്ഷപ്പെടും.

ആ ചിഹ്​നത്തിൽ അമർത്തി ആവശ്യമുള്ള സേവനമെന്തെന്ന്​ അറിയിക്കുക-തുടർന്ന്​ ചെയ്യേണ്ട കാര്യങ്ങൾ വഴിവഴിയായി അംന വിശദീകരിച്ചുനൽകും. സേവനങ്ങൾ സമ്പൂർണമായി സ്​മാർട്ട്​ രീതിയിൽ ലഭ്യമാക്കാൻ മറ്റു വിഭാഗങ്ങളുമായി ഏകോപനം ചെയ്​തുവരികയാണെന്ന്​ അൽ റസൂഖി പറഞ്ഞു. കമാൻഡർ ഇൻ ചീഫ്​  മേജർ ജനറൽ അബ്​ദുല്ല ഖലീഫ അൽ മറിയുടെ നിർദേശാനുസരണമാണ്​ സ്​മാർട്ട്​ പദ്ധതികൾ നടപ്പാക്കുന്നത്​.