ക​ട​ലി​ലും അ​തി​വേ​ഗ സു​ര​ക്ഷ​യൊ​രു​ക്കി ദു​ബൈ പൊ​ലീ​സ്​

ദു​ബൈ: ക​ര​യി​ലെ​ന്ന​പോ​ലെ ക​ട​ലി​ലും അ​തി​വേ​ഗ സു​ര​ക്ഷ​യൊ​രു​ക്കി ദു​ബൈ പൊ​ലീ​സ്. എ​മി​റേ​റ്റി​ന്‍റെ സ​മു​ദ്ര​ഭാ​ഗ​ങ്ങ​ളി​ൽ​നി​ന്ന്​ അ​ടി​യ​ന്ത​ര സാ​ഹ​യം ആ​വ​ശ്യ​പ്പെ​ട്ടാ​ൽ 12.30 മി​നി​റ്റു​ക​ൾ​ക്ക​കം സേ​ന അ​വി​ടെ എ​ത്തി​ച്ചേ​രും. അ​ടി​യ​ന്ത​ര​മ​ല്ലാ​ത്ത സാ​ഹ​ച​ര്യ​ത്തി​ലും വ​ള​രെ വേ​ഗ​ത്തി​ൽ പ്ര​തി​ക​രി​ക്കു​ന്ന സം​വി​ധാ​ന​വും ഒ​രു​ക്കി​യി​ട്ടു​ണ്ടെ​ന്ന്​ അ​ധി​കൃ​ത​ർ വ്യ​ക്ത​മാ​ക്കി. ക​ഴി​ഞ്ഞ വ​ർ​ഷം ദു​ബൈ പോ​ർ​ട്ട് പൊ​ലീ​സ് സ്റ്റേ​ഷ​ൻ 152 സം​ഭ​വ​ങ്ങ​ൾ​ക്കാ​ണ്​ പ്ര​തി​ക​രി​ച്ച​ത്. സാ​മ്പ​ത്തി​ക ത​ർ​ക്ക​ങ്ങ​ളു​മാ​യി ബ​ന്ധ​പ്പെ​ട്ട പ​രാ​തി​ക​ള​ട​ക്കം ഇ​ത്ത​ര​ത്തി​ൽ പ​രി​ഹ​രി​ക്കാ​ൻ പൊ​ലീ​സ്​ സ്​​റ്റേ​ഷ​ന്​ ക​ഴി​ഞ്ഞി​ട്ടു​ണ്ട്.

ദു​ബൈ പൊ​ലീ​സ്​ ക​മാ​ൻ​ഡ​ർ ഇ​ൻ ചീ​ഫ്​ ല​ഫ്. ജ​ന​റ​ൽ അ​ബ്​​ദു​ല്ല ഖ​ലീ​ഫ അ​ൽ​മ​ർ​റി പ്ര​വ​ർ​ത്ത​ന​ങ്ങ​ൾ വി​ല​യി​രു​ത്തു​ന്ന​തി​നാ​യി സ്​​റ്റേ​ഷ​ൻ സ​ന്ദ​ർ​ശി​ച്ചി​രു​ന്നു. നി​യ​മ​ങ്ങ​ൾ പാ​ലി​ക്കു​ന്ന​ത്​ ഉ​റ​പ്പു​വ​രു​ത്താ​നാ​യി പൊ​ലീ​സ്​ ഉ​ദ്യോ​ഗ​സ്ഥ​ർ സ്വീ​ക​രി​ക്കു​ന്ന ന​ട​പ​ടി​ക​ൾ അ​ദ്ദേ​ഹം വി​ല​യി​രു​ത്തി. സ​മു​ദ്ര​നി​യ​മ​ങ്ങ​ൾ ലം​ഘി​ക്കു​ന്ന ബോ​ട്ടു​ക​ളെ ഉ​ദ്യോ​ഗ​സ്ഥ​ർ എ​ങ്ങ​നെ കൈ​കാ​ര്യം ചെ​യ്യു​ന്നു എ​ന്ന​തി​ന്‍റെ അ​ഭ്യാ​സ​പ്ര​ക​ട​ന​ത്തോ​ടെ​യാ​ണ് പ​രി​ശോ​ധ​ന ആ​രം​ഭി​ച്ച​ത്. ദു​ബൈ​യു​ടെ സ​മു​ദ്ര സു​ര​ക്ഷ ഉ​റ​പ്പു​വ​രു​ത്തു​ന്ന​തി​ൽ പോ​ർ​ട്ട്​ പൊ​ലീ​സ്​ സ്​​റ്റേ​ഷ​ന്‍റെ പ​ങ്ക്​ വ​ള​രെ പ്ര​ധാ​ന​പ്പെ​ട്ട​താ​ണെ​ന്ന്​ ക​മാ​ൻ​ഡ​ർ ഇ​ൻ ചീ​ഫ്​ പ​റ​ഞ്ഞു.

എ​മി​റേ​റ്റി​ലെ തീ​ര​ദേ​ശ ഗ​താ​ഗ​തം നി​രീ​ക്ഷി​ക്കു​ക, നി​യ​ന്ത്രി​ക്കു​ക, ക​ട​ൽ​യാ​ത്ര​ക്കാ​ർ​ക്കും വാ​ട്ട​ർ ബൈ​ക്ക് ഉ​പ​യോ​ക്താ​ക്ക​ൾ​ക്കും ബോ​ധ​വ​ത്ക​ര​ണ കാ​മ്പ​യി​നു​ക​ൾ ന​ട​ത്തു​ക തു​ട​ങ്ങി​യ പ്ര​വ​ർ​ത്ത​ന​ങ്ങ​ളി​ലും സ്​​റ്റേ​ഷ​ന്‍റെ പ്ര​വ​ർ​ത്ത​നം മാ​തൃ​കാ​പ​ര​മാ​ണ്.

അ​ധി​കാ​ര​പ​രി​ധി​യി​ൽ ഉ​ട​നീ​ളം 95 ശ​ത​മാ​നം സു​ര​ക്ഷ ക​വ​റേ​ജ് ന​ൽ​കാ​ൻ ക​ഴി​ഞ്ഞി​ട്ടു​ണ്ടെ​ന്നും റി​പ്പോ​ർ​ട്ടി​ങ്​ സൈ​റ്റു​ക​ളി​ൽ ഡ്യൂ​ട്ടി ഓ​ഫി​സ​റു​ടെ സാ​ന്നി​ധ്യം 100 ശ​ത​മാ​ന​മാ​ണെ​ന്നും അ​ദ്ദേ​ഹം വി​ല​യി​രു​ത്തി.